Վստահելիությունը հարցականի տակ է  

Ամռանը հրապարակված՝ ընկերությունների ֆինանսական արդյունքները, աշխարհաքաղաքական զարգացումները և դրամավարկային ու տնտեսական քաղաքականությանն առնչվող իրադարձությունները ներդրողներին դրդել են ավելի ուշադիր ուսումնասիրել բաժնետոմսերի և պարտատոմսերի շուկաները։ 

Մի կողմից՝ բաժնետոմսերի գները կայուն են մնացել և նույնիսկ աճել՝ շնորհիվ ընկերությունների ուժեղ ֆինանսական արդյունքների, որոնք առայժմ ամրապնդել են արհեստական բանականության ոլորտում ներդրումների հեռանկարների նկատմամբ վստահությունը։ Մյուս կողմից՝ պարտատոմսերի եկամտաբերությունն ամբողջ աշխարհում հասել է տասնամյակների ընթացքում չգրանցված բարձր մակարդակների։ Դրան հիմնականում նպաստել են կայուն գնաճի մտավախությունների պայմաններում խոշոր կենտրոնական բանկերի հետագա քայլերի շուրջ անորոշությունը, ինչպես նաև ֆինանսավորման կարիքների աճի և հարկաբյուջետային կարգավորման վերաբերյալ մտահոգությունները։  

ԱՄՆ-ում 30-ամյա գանձապետական պարտատոմսերի եկամտաբերությունը հասել է գրեթե երկու տասնամյակի ամենաբարձր մակարդակին, ինչից հետո Գանձապետարանը հայտարարել է պարտատոմսերի կրկնակի հետգնման ծրագրի մասին։ Այս քայլը, ինչպես նաև ԱՄՆ Գանձապետարանի և Ճապոնիայի բանկի համատեղ միջամտությունն իենի փոխարժեքին, կրկին մեծացրել են արժույթի արժեզրկումից պաշտպանող ակտիվների նկատմամբ հետաքրքրությունը։ Արդյունքում ԱՄՆ դոլարը թուլացել է մյուս հիմնական արժույթների նկատմամբ, իսկ ոսկու՝ որպես արժեքի պահպանման միջոցի դերն ավելի է ընդգծվել։ 

Քաղաքականություն մշակողների արժանահավատության և ընկերությունների պարտքային բեռի նկատմամբ ներդրողների ուշադրության աճին զուգահեռ մենք կենտրոնանում ենք հետևյալ հիմնական թեմաների վրա․ 

• ԱՄՆ միջանկյալ ընտրություններին ընդառաջ շուկաների համար առանցքային կլինի Գանձապետարանի՝ պարտատոմսերի հետգնման ծրագրի և Դաշնային պահուստի կողմից գնաճը զսպելու մանդատի փոխազդեցությունը։ Երկարաժամկետ պարտատոմսերի իրական եկամտաբերության վրա ճնշումը թուլացնելու համար Գանձապետարանի միջամտությունը պետք է զգալի չափեր ունենա, թեպետ Գանձապետարանի դիրքորոշումը կարող է նպաստել տոկոսադրույքների տատանումների զսպմանը։ Դաշնային պահուստը գործում է բավական նեղ հնարավորությունների շրջանակում․ գնաճը դեռևս գերազանցում է նպատակային մակարդակը, մինչդեռ աշխատաշուկայի վիճակը գնաճային ճնշումների ուժեղացում չի մատնանշում։ 

• ԱՄՆ Գանձապետարանի և Ճապոնիայի բանկի վերջին արժութային միջամտությունն ամրապնդել է Ճապոնիայի բանկի դրամավարկային քաղաքականության ռեժիմը փոխելու անհրաժեշտությունը՝ մեծացնելով ընթացիկ տոկոսադրույքների բարձրացման ցիկլի վերջնական տոկոսադրույքի վերաբերյալ սպասումները։ Վարչապետ Տակաիչին այլևս չի կարող շարունակել բոլոր ուղղություններով խթանող ռեֆլյացիոն քաղաքականությունը, որը ներառում է մեղմ հարկաբյուջետային և դրամավարկային քաղաքականություն, թույլ իեն և կապիտալի վերադարձ դեպի երկիր։ Քանի որ մեղմ հարկաբյուջետային քաղաքականությունը, ամենայն հավանականությամբ, կպահպանվի, ակնկալվում է, որ ճշգրտումը նախ տեղի կունենա իենի փոխարժեքի և դրամավարկային քաղաքականության միջոցով։ Այդ փոփոխությունները պետք է իրականացվեն այնպես, որ լարվածություն չառաջացնեն ֆիքսված եկամտաբերությամբ գործիքների համաշխարհային շուկաներում։ 

• Ռիսկերի աճի պայմաններում տնտեսությունը դեռևս դիմակայուն է։ Մերձավոր Արևելքում լարվածությունը պահպանվում է․ Հորմուզի նեղուցում մատակարարումների խափանումները դեռևս չեն վերացվել, իսկ Կարմիր ծովի հետ կապված ռիսկերն աճում են։ Նավթի մատակարարման այլընտրանքային ուղիների պահպանումը և Հորմուզի նեղուցը շրջանցելը վճռորոշ նշանակություն ունեն տնտեսության դիմակայունության ապահովման և գնաճային ճնշումների մեղմման համար։ Կարևոր է նաև հետևել կլիմայի փոփոխությամբ պայմանավորված պարենային ապրանքների գների աճի ռիսկերին և գազի գների դինամիկային, քանի որ Եվրոպայում, հատկապես՝ Գերմանիայում, պաշարները շարունակում են ցածր լինել։

• Արհեստական բանականության ուղղությունն ավելի ընտրողական բնույթ է ստանում։ Երկրորդ եռամսյակի ֆինանսական արդյունքները ցույց են տվել, որ ենթակառուցվածքների զարգացումն արագանում է, սակայն ֆինանսավորումն ավելի ու ավելի հաճախ իրականացվում է պարտքային միջոցների և արտահաշվեկշռային դիրքերի միջոցով։ Դա մեծացնում է երկարաժամկետ պարտքային գործիքների առաջարկով պայմանավորված ճնշումը և տեխնոլոգիական ընկերությունների գնահատումների ու պարտքային շուկաների միջև ստեղծում փոխադարձ ազդեցության շղթա, որը երկու տարի առաջ գոյություն չուներ։ Հետագայում առանցքային նշանակություն կունենա ընկերությունների պարտքային բեռի առավել խիստ ուսումնասիրումը։ 

• Զարգացող շուկաները շարունակում են դիմակայունություն ցուցաբերել և կարող են հետագայում ևս շահել պարտատոմսերի ու բաժնետոմսերի շուկաներում ներդրումները դիվերսիֆիկացնելու պահանջարկից։ Միևնույն ժամանակ, առանձին շուկաների և ակտիվների ընտրության հարցում ընտրողական մոտեցումը շարունակում է առանցքային նշանակություն ունենալ։ 

Այս պայմաններում մենք շարունակում ենք չափավոր նախապատվություն տալ ռիսկային ակտիվներին, քանի որ վարկավորման և իրացվելիության բարենպաստ պայմանների պահպանման դեպքում ընդհանուր տնտեսական պատկերը ևս դրական կմնա։ Սակայն խորքում կուտակվող ռիսկերը հաշվի առնելով՝ կարծում ենք, որ ներդրումների դիվերսիֆիկացումն այժմ առավել կարևոր է, քան երբևէ։

Ամունդի ներդրումային ինստիտուտ․ Կենտրոնական բանկերի քայլերը

Դաշնային պահուստ․ Ջեքսոն Հոլում Ուորշի ելույթն ընդհանուր առմամբ կոշտ էր՝ ընդգծելով գների կայունությունն ապահովելու հանձնառությունը։ Միևնույն ժամանակ, նա չազդարարեց տոկոսադրույքի մոտալուտ բարձրացման մասին և չսահմանեց դրամավարկային քաղաքականության փոփոխության որևէ հստակ շեմ։ Հիմնական ուղերձն այն է, որ տոկոսադրույքների նվազեցման համար այժմ ավելի լուրջ հիմքեր կպահանջվեն, իսկ դրանք երկար ժամանակ բարձր մակարդակում պահելու հավանականությունը մեծացել է։ Գնաճի կրկին արագացման դեպքում չի բացառվում նաև դրամավարկային պայմանների հետագա խստացումը։ Ելույթը ցույց տվեց, որ Դաշնային պահուստն առանձնապես հակված չէ վերանայելու իր առաջնահերթությունների վերաբերյալ մոտեցումները և սահմանափակ հնարավորություններ է տեսնում հետագա քաղաքականության մասին նախապես հստակ ազդակներ հաղորդելու համար։ Կարճաժամկետ տոկոսադրույքները կշարունակեն լինել դրամավարկային քաղաքականության հիմնական գործիքը, իսկ ոչ ավանդական միջոցները կունենան միայն սահմանափակ դեր։  

Ճապոնիայի բանկ․ Ընդունելով գնաճի արագացման ռիսկերի առկայությունը՝ Ճապոնիայի բանկը, ամենայն հավանականությամբ, մինչև 2027 թվականի կեսը կհասցնի չորս անգամ բարձրացնել տոկոսադրույքը՝ քաղաքականության տոկոսադրույքը հասցնելով չեզոք՝ 2 տոկոս մակարդակի։ Սա էական շրջադարձ է նախկինում որդեգրված աստիճանական կարգավորման քաղաքականությունից, որի արագացմանը նպաստել է թույլ իենի նկատմամբ ճնշման ուժեղացումը։ 

Ստորև ներկայացնում ենք ակտիվների առանձին դասերի վերաբերյալ մեր տեսակետները՝ ընթացիկ հիմնական սցենարի շրջանակում։ 

• Ֆիքսված եկամտաբերությամբ գործիքներ․ ԱՄՆ պարտատոմսերի ժամկետայնության նկատմամբ պահպանում ենք գրեթե չեզոք դիրքորոշումը՝ ակնկալելով կորի երկարաժամկետ և կարճաժամկետ հատվածների եկամտաբերությունների տարբերությունների մեծացում։ ԵՄ-ում նախապատվությունը տալիս ենք ծայրամասային երկրների պարտատոմսերին՝ առանցքային երկրների պարտատոմսերի համեմատ, և այստեղ ևս ակնկալում ենք եկամտաբերության կորի երկարաժամկետ և կարճաժամկետ հատվածների եկամտաբերությունների տարբերությունների մեծացում։ ՄԹ պարտատոմսերի ժամկետայնության նկատմամբ մեր դիրքորոշումը պակաս դրական է, իսկ Ճապոնիայում շարունակում ենք զգուշավորություն ցուցաբերել՝ հաշվի առնելով դրամավարկային քաղաքականության կարգավորումը։ Կորպորատիվ գործիքների նկատմամբ ընդհանուր առմամբ դրական ենք տրամադրված՝ դրանց ամբողջական եկամտաբերությունը հաշվի առնելով։ Նախապատվությունը տալիս ենք համաշխարհային ներդրումային դասի պարտքային գործիքներին՝ միաժամանակ փոքր-ինչ կրճատելով եվրոյով արտահայտված ներդրումային դասի գործիքներում մեր դիրքերը։  

• Բաժնետոմսեր․ շարունակում ենք կենտրոնանալ դիմակայուն, կառուցվածքային խաթարումներից զերծ բիզնես մոդելներ և կայուն հաշվեկշիռներ ունեցող ընկերությունների վրա։ Ռազմավարական առումով ԱՄՆ-ի նկատմամբ պահպանում ենք զգուշավոր դիրքորոշումը՝ բարձր գնահատումների և շուկայի կենտրոնացվածության ռիսկերի պատճառով։ Եվրոպայի նկատմամբ մեր երկարաժամկետ դրական տեսակետը մնում է անփոփոխ․ տարածաշրջանը գրավիչ է ընկերությունների շահույթի հեռանկարների և ռազմավարական ինքնավարությանն ուղղված քայլերի շնորհիվ։ Ճապոնիայի նկատմամբ ավելի դրական ենք տրամադրված՝ հաշվի առնելով ողջամիտ գնահատումները, բարձր շահութաբերությունը, բաժնետոմսերի հետգնումը, տնտեսական աճին նպաստող քաղաքականությունը և կորպորատիվ կառավարման զգալի բարեփոխումները։ Զարգացող շուկաներում Լատինական Ամերիկան հնարավորություն է տալիս դիվերսիֆիկացնել ներդրումները և նվազեցնել տեխնոլոգիական ոլորտից կախվածությունը։  

• Բազմաակտիվ ներդրումներ․ շարունակում ենք նախապատվություն տալ ռիսկային ակտիվներին, սակայն կենտրոնանում ենք ընթացիկ եկամուտ ապահովող գործիքների, ընտրողական մոտեցման և տարածաշրջանային դիվերսիֆիկացման վրա, այլ ոչ թե շուկայի որոշակի ուղղության վրա հիմնված խոշոր դիրքերի։ ԱՄՆ բաժնետոմսերի շուկայում հավասարակշռված դիրք ենք պահպանում՝ ներդրումները հավասարաչափ բաշխելով S&P 500 և S&P 500 Equal Weight ինդեքսների միջև։ Եվրոպայի նկատմամբ մեր դրական տեսակետը մնում է անփոփոխ։ Արտարժույթի շուկայում շարունակում ենք նախապատվություն տալ ավելի բարձր տոկոսային եկամուտ ապահովող զարգացող երկրների արժույթներին։ Հումքային ապրանքների մասով մեծացրել ենք ոսկու կշիռը՝ հաշվի առնելով կենտրոնական բանկերի գնումները, աշխարհաքաղաքական անորոշությունը և պարտքի կայունության վերաբերյալ մտահոգությունները։ 

ՖԻՔՍՎԱԾ ԵԿԱՄՈՒՏ 

Պարտատոմսերի եկամտաբերությունն աճում է 

Ամորի Դորսեյ

Ֆիքսված եկամտաբերությամբ ներդրումային գործիքների գծով ղեկավար

Համաշխարհային տնտեսությունը դեռևս դիմակայուն է, թեև աճը տարբեր երկրներում անհամաչափ է։ Տնտեսական քաղաքականությունների միջև խորացող տարբերությունները և աշխարհաքաղաքական լարվածությունը գնալով ավելի մասնատված մակրոտնտեսական միջավայր են ձևավորում։ Ամռանը նավթի գների տատանումները, որոնք հիմնականում պայմանավորված էին աշխարհաքաղաքական զարգացումներով, կրկին անորոշություն են առաջացրել գնաճի հետագա ընթացքի և, հետևաբար, դրամավարկային քաղաքականության հեռանկարների շուրջ։ Այս գործոնները, ֆինանսավորման աճող կարիքների և հարկաբյուջետային կարգավորման բացակայության հետ մեկտեղ, լարվածություն են առաջացրել ամբողջ աշխարհի երկարաժամկետ պարտատոմսերի շուկաներում։ 

Այդուհանդերձ, այս զարգացումներն էապես չեն փոխում մեր գնահատականը։ Դաշնային պահուստի քաղաքականության վերաբերյալ պահպանում ենք ավելի մեղմ կանխատեսումը՝ ակնկալելով, որ մինչև տարեվերջ տոկոսադրույքները կմնան անփոփոխ։ ԵԿԲ-ից ևս սպասում ենք ընդամենը մեկ լրացուցիչ բարձրացում։ Քանի որ երկարաժամկետ պարտատոմսերի եկամտաբերության վրա ճնշումը, ամենայն հավանականությամբ, կպահպանվի, շարունակում ենք ակնկալել եկամտաբերության կորերի երկարաժամկետ և կարճաժամկետ հատվածների եկամտաբերությունների տարբերությունների մեծացում բոլոր շուկաներում՝ բացառությամբ Ճապոնիայի։

Ժամկետայնության ու եկամտաբերության կորեր

• ԱՄՆ-ում պարտատոմսերի ժամկետայնության նկատմամբ պահպանում ենք գրեթե չեզոք դիրքորոշումը՝ նախապատվությունը տալով հնգամյա հատվածին և ակնկալելով կորի երկարաժամկետ և կարճաժամկետ հատվածների եկամտաբերությունների տարբերությունների մեծացում, քանի որ երկարաժամկետ պարտատոմսերի եկամտաբերության վրա ճնշումը կարող է պահպանվել։ 

• ԵՄ-ում շարունակում ենք նախապատվությունը տալ ծայրամասային երկրների պարտատոմսերին՝ առանցքային երկրների պարտատոմսերի համեմատ, և պահպանում ենք կորի երկարաժամկետ և կարճաժամկետ հատվածների եկամտաբերությունների տարբերությունների մեծացման վերաբերյալ մեր տեսակետը։ 

• ՄԹ-ում պահպանում ենք զգուշավոր դիրքորոշումը և շարունակում ենք ակնկալել եկամտաբերության կորի երկարաժամկետ և կարճաժամկետ հատվածների եկամտաբերությունների տարբերությունների մեծացում։։ 

• Ճապոնական պարտատոմսերի նկատմամբ շարունակում ենք զգուշավորություն ցուցաբերել՝ ակնկալելով եկամտաբերության կորի երկարաժամկետ և կարճաժամկետ հատվածների տարբերությունների փոքրացում։։  

Կորպորատիվ

• Ակտիվների այս դասի, հատկապես՝ բարձր վարկանիշ ունեցող գործիքների նկատմամբ շարունակում ենք չափավոր դրական դիրքորոշում պահպանել։ Քանի որ ոլորտների միջև տարբերությունները շարունակում են խորանալ, առանցքային նշանակություն կունենա ոլորտների և թողարկողների մանրակրկիտ ընտրությունը։ 

• Դրական ենք տրամադրված համաշխարհային ներդրումային դասի պարտքային գործիքների նկատմամբ, թեև փոքր-ինչ նվազեցրել ենք եվրոյով արտահայտված ներդրումային դասի գործիքներին տրվող նախապատվությունը։ 

• Շարունակում ենք ստորադաս պարտքային գործիքները գերադասել բարձր եկամտաբերությամբ պարտատոմսերից՝ նախապատվությունը տալով կարճաժամկետ պարտատոմսերին։ 

• Ոլորտային առումով նախապատվությունը տալիս ենք ֆինանսական հատվածին, իսկ ոչ ֆինանսական ոլորտներից՝ հեռահաղորդակցության, տեխնոլոգիական և դեղագործական ընկերություններին։ 

Զարգացող շուկաների պարտատոմսեր ու արտարժույթ 

• Զարգացող երկրների պարտքային գործիքների նկատմամբ դրական ենք տրամադրված՝ ԱՄՆ դոլարի թուլացման, գրավիչ իրական եկամտաբերության և հիմնարար ցուցանիշների բարելավման շնորհիվ։ 

• Դրական դիրքորոշում ունենք կոշտ արժույթով կորպորատիվ և սուվերեն պարտքային գործիքների նկատմամբ՝ նախապատվությունը տալով Լատինական Ամերիկային և Աֆրիկայի՝ Սահարայից հարավ ընկած երկրներին։ Տեղական արժույթով պարտատոմսերի դեպքում ցուցաբերում ենք ընտրողական մոտեցում՝ ըստ երկրների, և նախապատվությունը տալիս Բրազիլիային, Հունգարիային ու Հարավային Աֆրիկային։  

•  Զարգացող երկրների արժույթների նկատմամբ զգուշավոր ենք՝ Լատինական Ամերիկայի և Կենտրոնական ու Արևելյան Եվրոպայի արժույթները գերադասելով ասիական արժույթներից։  

ԲԱԺՆԵՏՈՄՍԵՐ 

Աճի դիրքերի ամրապնդում՝ խորացող տարբերությունների պայմաններում

Բարրի Գլավին

Բաժնետոմսերի հարթակի ղեկավար 

Բաժնետոմսերի շուկաները փոքր-ինչ աճել են՝ Եվրոպայի և զարգացող շուկաների առաջատարությամբ։ Ատլանտյան օվկիանոսի երկու կողմերում էլ ընկերությունների շահույթի աճը շարունակում է կայուն մնալ։ Ֆինանսական արդյունքների հրապարակման շրջանը բացահայտել է առանձին բաժնետոմսերի ցուցանիշների զգալի տարբերություններ․ ներդրողները բարձր են գնահատել աճ գրանցած ընկերությունները և բացասաբար արձագանքել սպասումները չարդարացրած արդյունքներին։ Միաժամանակ, շահույթի կանխատեսումները զգալիորեն վերանայվել են դեպի վեր։ Արդյունքում դրանց բարելավման տեմպը հասել է այնպիսի մակարդակի, որը սովորաբար գրանցվում է տնտեսական վերականգնման փուլերում։ Զարգացող շուկաներում ևս ընկերությունների շահույթը կայուն է մնում։ 

Շարունակում ենք աշխարհագրորեն դիվերսիֆիկացնել ներդրումները՝ նվազեցնելով ԱՄՆ-ի կշիռը և դրանով սահմանափակելով շուկայի կենտրոնացվածության ու բարձր գնահատումների հետ կապված ռիսկերը։ Եվրոպան գրավիչ է ընկերությունների շահույթի աճի և ռազմավարական ինքնավարությանն ուղղված քայլերի շնորհիվ։ Ճապոնիայում հնարավորություններ ենք տեսնում՝ հաշվի առնելով բարձր շահութաբերությունը, բաժնետոմսերի հետգնումը, տնտեսական աճին նպաստող քաղաքականությունը և կորպորատիվ կառավարման զգալի բարեփոխումները։ Զարգացող շուկաների նկատմամբ շարունակում ենք դրական դիրքորոշում պահպանել՝ միաժամանակ կարևորելով արհեստական բանականությանն ուղղված կապիտալ ծախսերի աճի ազդեցությունը բաժնետոմսերի ինդեքսների վրա։  

Զարգացած շուկաներ 

• Կենտրոնանում ենք արհեստական բանականության հետևանքով հնարավոր խաթարումների նկատմամբ դիմակայուն ընկերությունների բաժնետոմսերի վրա՝ առաջին անհրաժեշտության սպառողական ապրանքների, առողջապահության, արդյունաբերության և հումքի ոլորտներում։ 

• Եվրոպայում պահպանում ենք դրական դիրքորոշումը տեխնոլոգիական ընկերությունների բաժնետոմսերի նկատմամբ, իսկ դրանց գնահատումների հնարավոր անկումը կարող է ներդրումային լավ հնարավորություններ ստեղծել։ Շահութաբերության, գնահատումների և մատակարարման շղթաների վերաբերյալ մտահոգությունները հաշվի առնելով՝ ընտրողաբար ներդրումներ ենք կատարում արհեստական բանականության զարգացումն ապահովող ընկերություններում՝ խուսափելով կապիտալի ոչ արդյունավետ բաշխման ռիսկ ունեցող ընկերություններից։ Արտադրական ապրանքներ արտադրող ընկերությունները կարող են շահել տվյալների կենտրոնների աճող պահանջարկից, իսկ շինարարական ընկերությունները՝ ենթակառուցվածքային ծախսերի ավելացումից։  Համաշխարհային ֆինանսական հատվածում առանձին ընկերությունների բաժնետոմսերի մանրակրկիտ ընտրությունն այժմ, մեր կարծիքով, վճռորոշ նշանակություն ունի։ 

• Ճապոնիայում նախապատվությունը տալիս ենք փոքր և միջին կապիտալացմամբ այն ընկերությունների բաժնետոմսերին, որոնք կարող են շահել արտադրության տեղայնացումից, մատակարարման շղթաների դիմակայունության ամրապնդումից, ինչպես նաև պաշտպանության, արհեստական բանականության և ենթակառուցվածքների ոլորտների զարգացումից։ Մասնավորապես, կենտրոնանում ենք ներքին շուկայում գործող արդյունաբերական ընկերությունների վրա։

Զարգացող շուկաներ 

• Շահույթի ցուցանիշները շարունակում են բարձր մնալ՝ թվայնացման շնորհիվ։ Թայվանցի և հարավկորեացի մատակարարները շահում են արհեստական բանականության ոլորտի արագ աճից, սակայն շահույթի ներկայիս բարձր մակարդակը, ամենայն հավանականությամբ, երկար չի պահպանվի։ ԱՄՆ տեխնոլոգիական հատվածի ծախսերը շարունակում են խթանել պահանջարկը՝ չնայած ներդրումների եկամտաբերության, պարտքային բեռի և չինական ընկերությունների մրցակցության վերաբերյալ մտահոգություններին։ 

• Չինաստանի նկատմամբ պահպանում ենք չեզոք դիրքորոշումը։ Թեև պետական ներդրումները կարող են արագանալ, դրանց զգալի մասը, ամենայն հավանականությամբ, կուղղվի ենթակառուցվածքներին՝ հատկապես հաշվողական հզորությունների ընդլայնմանը։ Ներքին սպառմանն ուղղված աջակցությունը, ըստ ամենայնի, կշարունակի աստիճանաբար ավելանալ։ Արտադրական ավելցուկային հզորությունների պայմաններում ընկերությունների շահույթի հեռանկարն անորոշ է, իսկ անառողջ ներքին մրցակցությունը սահմանափակելուն ուղղված միջոցառումների արդյունքները տեսանելի դառնալու համար ժամանակ կպահանջվի։ 

• Բրազիլիայում, եթե Լուլան հաղթի հոկտեմբերյան ընտրություններում, շուկայի անկման հավանականությունը սահմանափակ է թվում, իսկ նրա պարտության դեպքում աճի ներուժը կարող է զգալի լինել։ Միաժամանակ, Բրազիլիայում մտահոգություն են առաջացնում հարկաբյուջետային և դրամավարկային քաղաքականության հետ կապված ռիսկերը, ինչպես նաև Էլ Նինյոյով պայմանավորված գնաճային ճնշումները։

ԲԱԶՄԱԿՏԻՎՆԵՐ (MULTI-ASSET)

Չափավոր նախապատվություն ռիսկային ակտիվներին՝ ընտրողական մոտեցմամբ

Ֆրանչեսկո Սանդրինի 

Բազմակտիվների ռազմավարության գծով ստորաբաժանման ղեկավար  

Ջոն Օթուլ 

Բազմակտիվների ներդրումների գծով լուծումների ստորաբաժանման ղեկավար   

Ընդհանուր տնտեսական միջավայրը շարունակում է չափավոր բարենպաստ մնալ․ տնտեսական աճը մինչ այժմ դիմակայուն է եղել, հատկապես՝ Եվրոպայում, իսկ գնաճը թուլացման որոշ նշաններ է ցույց տվել։ Քանի որ շուկաները շարունակում են զգայուն լինել աշխարհաքաղաքական լարվածության կամ գնաճային ճնշումների հնարավոր վերականգնման նկատմամբ, մենք պահպանում ենք ռիսկային ակտիվների մասով դրական դիրքորոշումը՝ հստակ նախապատվություն տալով ընթացիկ եկամուտ ապահովող գործիքներին, ընտրողական մոտեցմանը և տարածաշրջանային դիվերսիֆիկացմանը։

Բաժնետոմսերի մասով շարունակում ենք դիվերսիֆիկացված մոտեցում ցուցաբերել՝ նախապատվությունը տալով ավելի գրավիչ գնահատումներ և կենտրոնացվածության ավելի ցածր ռիսկ ունեցող շուկաներին ու ոլորտներին։ ԱՄՆ-ում պահպանում ենք հավասարակշռված դիրք՝ ներդրումները հավասարաչափ բաշխելով S&P 500 և S&P 500 հավասար կշռված ինդեքսների միջև։ Եվրոպայի նկատմամբ շարունակում ենք դրական դիրքորոշում ունենալ։ Այստեղ գնահատումները դեռևս գրավիչ են, ներդրողների դիրքերը՝ համեմատաբար փոքր, իսկ տնտեսական քաղաքականության միջավայրը՝ բարենպաստ։ Շարունակում ենք նաև տեսնել ցիկլիկ վերականգնման հնարավորություն, որից օգտվելու լավ դիրքերում են բանկերը և տնտեսության ցիկլից կախված մյուս ոլորտները։ Զարգացող շուկաներում Լատինական Ամերիկան ևս շարունակում է գրավիչ մնալ՝ մյուս զարգացող շուկաների համեմատ հետաքրքիր գնահատումների շնորհիվ։

Ֆիքսված եկամտով գործիքների մասով ԱՄՆ-ում և Եվրոպայում շարունակում ենք նախապատվություն տալ ավելի երկար ժամկետայնությանը։ Սակայն երկարաժամկետ պարտատոմսերի հատվածում առկա ճնշումները մեզ դրդել են ավելի պաշտպանողական դիրք ընդունել ԱՄՆ եկամտաբերության կորի նկատմամբ՝ այժմ ակնկալելով դրա երկարաժամկետ և կարճաժամկետ հատվածների եկամտաբերությունների տարբերությունների մեծացում։ Ճապոնիայի նկատմամբ շարունակում ենք զգուշավոր մնալ։ Կորպորատիվ գործիքների մասով պահպանում ենք դրական դիրքորոշումը եվրոյով արտահայտված ներդրումային դասի պարտքային գործիքների նկատմամբ՝ հաշվի առնելով դրանց դեռևս գրավիչ հարաբերական գնահատումները և տոկոսային տարբերությունների կայուն մնալու կամ հետագա նվազման հնարավորությունը։ Միաժամանակ, ուշադրությամբ հետևում ենք իրացվելիության պայմաններին։ Դրական ենք գնահատում նաև զարգացող շուկաների պարտքային գործիքների տոկոսային տարբերությունների հեռանկարները, քանի որ դրանք շարունակում են գրավիչ ընթացիկ եկամուտ ապահովել և օգտվել շուկայում տիրող բարենպաստ տրամադրություններից։

Հումքային ապրանքների մասով ավելի դրական դիրքորոշում ենք որդեգրել ոսկու նկատմամբ։ Կենտրոնական բանկերի գնումները շարունակում են մեծ ծավալ ունենալ, իսկ աշխարհաքաղաքական անորոշությունը, պարտքի կայունության վերաբերյալ մտահոգությունները և դոլարի թուլացումը շարունակում են պահպանել ոսկու նկատմամբ կառուցվածքային պահանջարկը։ 

Արտարժույթի շուկայում նախապատվությունը տալիս ենք ավելի բարձր տոկոսային եկամուտ ապահովող զարգացող երկրների արժույթներին, որոնցից բրազիլական ռեալը և թուրքական լիրան պահպանում են գրավիչ եկամտաբերությունը։ 

ՀԵՌԱՆԿԱՐՆԵՐ

Ակտիվների դասերի վերաբերյալ Ամունդի դիրքորոշում

ԿԱՐԵՎՈՐ ՏԵՂԵԿՈՒԹՅՈՒՆ

ՄՍՄԿ-ի տեղեկությունները կարող են գործածվել միայն Ձեր ներքին օգտագործման համար, չեն կարող վերարտադրվել կամ տարածվել որևէ ձևով և չեն կարող գործածվել որպես որևէ ֆինանսական գործիքի կամ պրոդուկտի կամ ինդեքսի հիմք կամ դրա բաղադրիչ։ ՄՍՄԿ-ի որևէ տեղեկություն նախատեսված չէ լինելու ներդրումային խորհրդատվություն կամ որևէ տեսակի ներդրումային որոշում կայացնելու (կամ դրանից զերծ մնալու) առաջարկություն, և դրա վրա չի կարելի հիմնվել որպես այդպիսին։ Պատմական տվյալները և վերլուծությունը չպետք է ընկալվեն որպես որևէ հետագա կատարողականի վերլուծության, կանխատեսման կամ կանխագուշակման մասին նշում կամ երաշխիք։ ՄՍՄԿ-ի տեղեկությունները տրամադրվել են «այնպես, ինչպես կա» հիմքով, և սույն տեղեկություններն օգտագործողն ստանձնում է սույն տեղեկությունների ցանկացած օգտագործման բոլոր ռիսկերը։ ՄՍՄԿ-ն, դրա փոխկապակցված անձինք և յուրաքանչյուր անձ, որը ներգրավված է ՄՍՄԿ-ի որևէ տեղեկություն կազմելուն կամ կապված է դրա հետ (միասին «ՄՍՄԿ կողմեր»), սույն տեղեկությունների մասով բացահայտ հրաժարվում է բոլոր երաշխիքներից (այդ թվում, առանց սահմանափակման, բնօրինակության, ճշգրտության, ամբողջականության, ժամանակին լինելու, խախտում չկատարելու, վաճառքի համար պիտանիության և կոնկրետ նպատակին համապատասխանության վերաբերյալ ցանկացած երաշխիքից)։ Չսահմանափակելով վերոնշյալ որևէ դրույթ, ՄՍՄԿ որևէ կողմ որևէ դեպքում չի կրում որևէ պատասխանատվություն որևէ ուղղակի, անուղղակի, հատուկ, պատահական, պատժիչ, հետևանքային (այդ թվում, առանց սահմանափակման, բաց թողնված օգուտի) կամ որևէ այլ վնասի համար։ (www.mscibarra.com)։ 

SM արդյունաբերությունների դասակարգման համաշխարհային ստանդարտը (ԱԴՀՍ) մշակվել է «Ստենդրդ ընդ Փուրզ»-ի և ՄՍՄԿ-ի կողմից և դրանց բացառիկ սեփականությունն ու ծառայությունների ապրանքանիշն է։ Ոչ «Ստենդրդ ընդ Փուրզ»-ը, ՄՍՄԿ-ն և ոչ էլ ԱԴՀՍ որևէ դասակարգում մշակելուն կամ կազմելուն ներգրավված որևէ այլ կողմ որևէ բացահայտ կամ ենթադրյալ երաշխիք կամ հավաստիացում չի տալիս այդ ստանդարտի կամ դասակարգման (կամ դրանց օգտագործումից ստացվելիք արդյունքի) վերաբերյալ, և այդ բոլոր կողմերը սույնով բացահայտ հրաժարվում են ցանկացած այդպիսի ստանդարտի կամ դասակարգման առնչությամբ բնօրինակության, ճշգրտության, ամբողջականության, վաճառքի համար պիտանիության կամ կոնկրետ նպատակին համապատասխանության վերաբերյալ ցանկացած երաշխիքից։ Չսահմանափակելով վերոնշյալ որևէ դրույթ, «Ստենդրդ ընդ Փուրզ»-ը, ՄՍՄԿ-ն, դրան որևէ փոխկապակցված անձ կամ ԱԴՀՍ որևէ դասակարգում մշակելուն կամ կազմելուն ներգրավված որևէ երրորդ կողմ որևէ պատասխանատվություն չի կրում որևէ ուղղակի, անուղղակի, հատուկ, պատժիչ, հետևանքային կամ որևէ այլ վնասի (այդ թվում՝ բաց թողնված օգուտի) համար, նույնիսկ եթե ծանուցվել է այդ վնասների հնարավոր լինելու մասին։

Սույն փաստաթուղթը նախատեսված է միայն տեղեկատվական նպատակների համար: Սույն փաստաթուղթը չի  հանդիսանում վաճառքի առաջարկ, գնման առաջարկի հրավեր կամ որևէ արժեթղթի կամ որևէ այլ պրոդուկտի կամ ծառայության առաջարկություն։ Ցանկացած արժեթուղթ, պրոդուկտ կամ ծառայություն, որին հղում է կատարվում, կարող են գրանցված չլինել Ձեր պետությունում համապատասխան մարմնի կողմից վաճառքի համար և կարող են չկարգավորվել կամ չվերահսկվել Ձեր պետությունում որևէ պետական կամ համանման մարմնի կողմից։ Այս փաստաթղթում պարունակվող տեղեկատվությունը չպետք է փոփոխվի կամ ներկայացվի այնպես, որ առաջացնի թյուրընկալումներ կամ սխալ հավաստիացումներ։ Փաստաթղթի բովանդակության ցանկացած օգտագործում, վերարտադրում կամ տարածում առանց ամբողջական և պատշաճ հղման սկզբնաղբյուրին արգելվում է։ Սույն փաստաթղթում պարունակվող ցանկացած տեղեկություն չի կարող օգտագործվել որպես որևէ ֆինանսական գործիքի կամ պրոդուկտի կամ ինդեքսի հիմք կամ դրա բաղադրիչ։ Ավելին, ոչինչ սույն փաստաթղթում նախատեսված չէ հարկային, իրավական կամ ներդրումային խորհրդատվություն տրամադրելու համար։ Եթե այլ բան նշված չէ, ապա սույն փաստաթղթում պարունակվող բոլոր տեղեկություններն ստացվել են «Ամունդի Ասեթ Մենեջմենթ ԷսԱԷս» ընկերությունից և ներկայաված են 2026 թվականի սեպտեմբերի 9-ի դրությամբ։ Դիվերսիֆիկացիան չի երաշխավորում շահույթ կամ չի պաշտպանում կորուստից։ Սույն փաստաթուղթը տրամադրվել է «այնպես, ինչպես կա» հիմքով, և սույն տեղեկություններն օգտագործողն ստանձնում է սույն տեղեկությունների ցանկացած օգտագործման բոլոր ռիսկերը։ Պատմական տվյալները և վերլուծությունը չպետք է ընկալվեն որպես որևէ հետագա կատարողականի վերլուծության, կանխատեսման կամ կանխագուշակման մասին նշում կամ երաշխիք։ Շուկայի և շուկայի միտումների վերաբերյալ արտահայտված տեսակետները հեղինակի տեսակետներն են և պարտադիր չէ, որ լինեն «Ամունդի Ասեթ Մենեջմենթ ԷսԱԷս» ընկերության կամ Ամունդի-Ակբա Ասեթ Մենեջմենթ ՓԲԸ-ի տեսակետներ ու ցանկացած պահի ենթակա են փոփոխության՝ շուկայի և այլ պայմանների հիման վրա, և չեն կարող լինել հավաստիացումներ առ այն, որ երկրները, շուկաները կամ ոլորտները կհամապատասխանեն ակնկալիքներին։ Սույն տեսակետները պետք չէ հիմք ընդունել որպես ներդրումային խորհրդատվություն, արժեթղթի առաջարկություն կամ «Ամունդի» ընկերության կամ Ամունդի-Ակբայի որևէ պրոդուկտի առքուվաճառքի մասին նշում։ Ներդրումը ներառում է ռիսկեր, այդ թվում՝ շուկայական, քաղաքական, իրացվելիության և արժույթի հետ կապված ռիսկեր։ Ավելին, «Ամունդին» կամ Ամունդի-Ակբան որևէ դեպքում չեն կրում որևէ պատասխանատվություն դրա հետևանքով առաջացած որևէ ուղղակի, անուղղակի, հատուկ, պատահական, պատժիչ, հետևանքային (այդ թվում, առանց սահմանափակման, բաց թողնված օգուտի) կամ որևէ այլ վնասի համար։

Առաջին օգտագործման ամսաթիվը՝ 2026թ. սեպտեմբերի 9։ 

«Ամունդի-Ակբա Ասեթ Մենեջմենթ» ՓԲԸ-ն իրավաբանական անձ է, որը գրանցված է Հայաստանի Հանրապետությունում և Հայաստանի Կենտրոնական բանկի կողմից տրամադրած ներդրումային ֆոնդերի կառավարման թիվ 0002-ի լիցենզիայի հիման վրա, Հայաստանի Հանրապետությունում իրականացնում է պարտադիր կենսաթոշակային ֆոնդերի կառավարում։ Գրանցված գրասենյակը գտնվում է Երևան, Վազգեն Սարգսյան 10, 100-101 տարածք։  

Ամունդի-Ակբայի մասին ավելին իմանալու համար կարող եք այցելել www.amundi-acba.am կամ զանգահարել 011-310-000։