Շուկայում կարճաժամկետ ընկալումների փոփոխություն

Վերջին մի քանի շաբաթներում շուկաներում դիտվում էր գնաճի սպասումների աճ, կենտրոնական բանկերի հեռանկարների փոփոխություն և հակասական նորությունների հոսք՝ երբեմն ընդամենը մի քանի օրվա ընթացքում։ Սա հանգեցրեց տոկոսադրույքների աճի և ռիսկային ակտիվների գների անկմանը հակամարտության սկզբին։ ԱՄՆ-ի, Եվրոպայի և զարգացող շուկաների մեծ մասի բաժնետոմսերն այժմ վերադարձել են գրեթե մինչպատերազմյան մակարդակներին։

Պատերազմը դադարեցնելու ուղղությամբ ջանքերն ու փխրուն հրադադարն աջակցել են ռիսկային ակտիվներին, սակայն աճը բազմիցս սահմանափակվել է հակամարտության չլուծված լինելու և տոկոսադրույքների երկար ժամանակ բարձր մակարդակներում պահպանվելու հեռանկարով։ Շուկայի միտումները փոխվում են ընդհանուր տրամադրության՝ հատկապես հրադադար լինելու կամ չլինելու, ռիսկի դիմելու կամ ռիսկից խուսափելու, գնաճի կամ տնտեսական աճի վերաբերյալ մտահոգությունների շուրջ։ Առաջ նայելով՝ կարծում ենք, որ՝

• Հիմնական ռիսկն ընդհանուր գնաճի փոխանցումն է բնականոն գնաճին։ Այն տնտեսություններում, որտեղ գնաճն արդեն բարձր է, թիրախային մակարդակներին մոտենալու գործընթացը կարող է ընդհատվել, մինչդեռ այն տնտեսություններում, որտեղ գնաճն արդեն հասել է թիրախային մակարդակներին, առկա է սպասումների ապակայունացման ոչ աննշան ռիսկ։

• Տնտեսական աճի հեռանկարն ավելի թույլ է (թեև ոչ անկումային)՝ կախված այս ցնցման պայմաններում տնտեսության վրա պահպանման և փոխանցման աստիճանից, ինչպես նաև էներգակիրների բարձր գների պահպանման տևողությունից։ 2026 թվականի սկզբի համար ակնկալվող դրական իմպուլսը փոխարինվել է առավել զուսպ տնտեսական աճով՝ պայմանավորված իրական եկամուտների կրճատմամբ և բիզնես վստահության անկմամբ։

• Զարգացած շուկաների հարկաբյուջետային հեռանկարն արդեն լարված էր մինչև այս ճգնաժամը, և դրա արդյունքում չենք ակնկալում լայնածավալ հարկաբյուջետային աջակցություն աշխարհի մեծ մասում, ներառյալ՝ ԱՄՆ-ում, Եվրագոտում և ՄԹ-ում։ Աջակցությունը կլինի թիրախային՝ նախատեսված տնային տնտեսությունների և ռազմավարական նշանակություն ունեցող ոլորտների համար ընտրողական օժանդակության տեսքով։ Նույնիսկ զարգացող շուկաներում արձագանքները կլինեն երկրին ներհատուկ։

«Կենտրոնական բանկերը պահպանում են զգոն, վստահություն ներշնչող և ճկուն մոտեցում՝ հիմնված գնաճի վերահսկման վրա, ուշադիր լինելով ցնցումների նկատմամբ և վճռական՝ չափազանց կոշտ չարձագանքելու, սակայն նաև հետ չմնալու հարցում»։

Մոնիկա Դեֆենդ

Ամունդի ներդրումային ինստիտուտի ղեկավար

Տնտեսական աճի, էներգետիկայի, տրանսպորտի, բեռնափոխադրումների, ապահովագրության և ներդրողների/սպառողների վստահության վերաբերյալ մեր կանխատեսած հաջորդականությունը հաստատվել է։

Սովորաբար տնտեսական աճի վրա բացասական ազդեցությունը դրսևորվում է որոշակի ուշացումով՝ պայմանավորված իրական եկամուտների թուլացմամբ, մարժաների նկատմամբ ճնշմամբ, պահանջարկի նվազմամբ և քաղաքականության ճկունության սահմանափակմամբ։ Երկրորդ, մենք արդեն տեսնում ենք առավել ակնառու միտումներ՝ Եվրոպայի, ԱՄՆ-ի և զարգացող շուկաների միջև տարածաշրջանային անհամաչափության տեսքով։ Երրորդ, կենտրոնական բանկերն առայժմ գործել են մեր ակնկալիքներին համապատասխան և շարունակելու են պահպանել զգուշավոր ու արձագանքող, այլ ոչ թե կանխարգելիչ մոտեցում։

Վերոնշյալի համատեքստում ի՞նչ է փոխվել վերջին մեկ ամսվա ընթացքում։

• Թեև դանդաղ տնտեսական աճի վերաբերյալ մեր բազային սցենարը չի փոխվել, դրա հավանականությունը նվազել է, քանի որ այժմ տեսնում ենք նվազման ուղղությամբ ավելի բարձր ռիսկեր։ Մարտին մեր շրջանակը դեռ հիմնված էր թիրախային մակրոտնտեսական ճշգրտումների վրա՝ ներառյալ էներգետիկ ցնցումը, տնտեսական աճի սահմանափակ փոփոխությունը և քաղաքականության զգուշավոր արձագանքը։ Կցանկանայինք կրկին ընդգծել, որ էներգետիկ ցնցման շարունակականությունն ավելի կարևոր նշանակություն կունենա, քան հենց սկզբնական ցնցումը։ Կենտրոնական բանկերը պահպանում են զգոն, վստահություն ներշնչող և ճկուն մոտեցում՝ հիմնված գնաճի վերահսկման վրա, ուշադիր լինելով ցնցումների նկատմամբ և վճռական՝ չափազանց կոշտ չարձագանքելու, սակայն նաև հետ չմնալու հարցում։

• Այժմ այս իրադարձությունը դիտարկում ենք ոչ թե որպես մեկանգամյա ցնցում կամ «սև կարապի» իրադարձություն, այլ որպես շարունակական և երկարատև իրականություն, որը հետագայում կարող է վերածվել մակրոֆինանսական ցնցման։ Մարտին հիմնական ուշադրությունը կենտրոնացած էր Հորմուզի նեղուցի, նավթի տարանցման և խափանումների անմիջական հետևանքների վրա։ Այսօր մեկնաբանությունն ավելի լայն է և կարող է ունենալ ավելի երկարատև ազդեցություն։

• Քաղաքականության անհամաչափությունն առավել ակնհայտ է դարձել։ Անցյալ ամիս կենտրոնական բանկերի քաղաքականության վերաբերյալ մեր տեսակետն այն էր, որ կենտրոնական բանկերը կպահպանեն զգուշավոր մոտեցում մինչև տոկոսադրույքների բարձրացումը և կարող են անտեսել գնաճի ժամանակավոր աճը։ Այժմ կարծում ենք, որ կենտրոնական բանկերը կպահպանեն «կարգապահ ճկունություն»՝ պաշտպանելով իրենց վստահելիությունը, պահպանելով գնաճի սպասումների կայունությունը, ուշադիր հետևելով երկրորդային ազդեցություններին (անչափ կարևոր գործոն) և միաժամանակ պահպանելով բավարար ճկունություն՝ ցնցումներին արձագանքելու համար՝ առանց տնտեսության խոցելիության պայմաններում մեխանիկորեն խստացման գնալու։ Սա է պատճառը, որ առայժմ սպասողական ենք Դաշնային պահուստի և ԵԿԲ-ի նկատմամբ և տոկոսադրույքների նվազեցման սպասումները տեղափոխել ենք 2027 թվական։

Ի՞նչ գործոնների ենք մենք ուշադիր հետևում, որոնք կարող են փոխել մեր տեսակետները։

• Պարսից ծոցի տարածաշրջանից նավթի, գազի և այլ հումքային ապրանքների մատակարարման խափանումների երկարատև շարունակությունը կհանգեցնի տնտեսությունում երկրորդային ազդեցությունների։

• Սա նշանակում է, որ ճգնաժամի փոխանցումն էներգետիկային, տրանսպորտին և տնտեսության այլ հատվածներին ընդհանուր առմամբ կազդի գների վրա։ Սակայն եթե սպառողական գներին փոխանցումը հնարավոր չլինի, ապա ազդեցությունը կտեղափոխվի կորպորատիվ մարժաների վրա, ինչը կնշանակի մեր տեսակետների վերանայում։ Այս ցնցման նկատմամբ հատկապես խոցելի է Եվրոպան։

• Կենտրոնական բանկերի կողմից ցանկացած դրամավարկային խստացում չափազանց կարևոր կլինի։ Եթե Դաշնային պահուստը կամ ԵԿԲ-ն կրկին ցուցաբերեն խիստ դրամավարկային հակումներ, ապա ժամկետայնության (դյուրացիա) վերաբերյալ մեր գնահատականը, հատկապես եկամտաբերության կորի կարճ հատվածում, կփոխվի։

• Մեկ բաժնետոմսին բաժին ընկնող շահույթի վերանայումները՝ որպես ավելի երկարատև ճգնաժամի հետևանք։

• Ներկայում իրացվելիությունն ու վարկավորման փոխանցման մեխանիզմները շարունակում են աջակցել ռիսկային ակտիվներին։ Բաժնետոմսերի շուկայի տատանողականությունը ցածր է, և ֆիքսված եկամտաբերությամբ պարտքային գործիքների հատվածում կապիտալի արտահոսքեր չենք արձանագրում․ տեխնիկական գործոնները ևս մնում են համեմատաբար բարենպաստ։ Այս ոլորտում ցանկացած փոփոխություն կազդի մեր տեսակետների վրա։

Սա այն ժամանակահատվածն է, երբ անհրաժեշտ է հիմնվել երկարաժամկետ համոզմունքների վրա և, եթե ռիսկային ակտիվները հնարավորություն են ստեղծում, ապա ուսումնասիրել այն հատվածները, որտեղ շահույթներն ու հիմնարար ցուցանիշները մնում են կայուն՝ միաժամանակ կիրառելով պաշտպանական մեխանիզմներ։

• Ֆիքսված եկամտաբերությամբ գործիքների հատվածում մենք չենք ակնկալում հստակ ուղղորդված կարծիքներ ժամկետայնության վերաբերյալ, այլ առավելապես կենտրոնանում ենք տարբեր եկամտաբերության կորերի և հարաբերական արժեքի հնարավորությունների վրա։ Կորի կարճ հատվածը շարունակում է զգայուն մնալ խիստ դրամավարկային վերագնահատման նկատմամբ, մինչդեռ տնտեսական աճի թուլացումը ժամանակի ընթացքում պետք է սահմանափակի երկար հատվածը։ Սա պահանջում է առավել տարբերակված ներդրումային մոտեցում։ Ժամկետայնության (դյուրացիա) մասով մենք բարձրացրել ենք ՄԹ նկատմամբ մեր դիրքորոշումը և այժմ չեզոք ենք ԱՄՆ-ի նկատմամբ։ Մենք նաև ընտրողականորեն ուսումնասիրում ենք կորպորատիվ վարկերն ու զարգացող շուկաների պարտքը, որոնց նկատմամբ շարունակում ենք պահպանել դրական դիրքորոշում, թեև մարտավարական առումով նվազեցրել ենք հնդկական պարտատոմսերի նկատմամբ մեր գնահատականը։

• Բաժնետոմսերի շուկայում ապրիլին արձանագրված վերականգնումը վկայում է Մերձավոր Արևելքի ճգնաժամի արագ հանգուցալուծման վերաբերյալ շուկաների ակնկալիքների մասին։ Թեև ԱՄՆ-ը կառուցվածքային առումով շարունակում է մնալ բաժնետոմսերի շուկայի ամենաուժեղ տարածաշրջանը, այն նաև առավել կենտրոնացված է և որոշ դեպքերում արձանագրում է բարձր գնահատումներ։ Հետևաբար, արժեք ենք որոնում այնպիսի տարածաշրջաններում, ինչպիսիք են Եվրոպան, Ճապոնիան և Լատինական Ամերիկայի պես զարգացող շուկաները։ Թեև Եվրոպան կարող է պակաս գրավիչ լինել որպես զուտ բետա կանխատեսում, այն առավել հետաքրքիր է ոլորտային դիվերգենցիայի և ընտրողական թեմաների տեսանկյունից, ինչպիսիք են արդյունաբերական քաղաքականությունը, ենթակառուցվածքները և պաշտպանությունը։

• Բազմաակտիվ ռազմավարություններում ճգնաժամը մեզ մղում է պահպանել առավել տարբերակված դիրքորոշում ակտիվների դասերի և տարածաշրջանների միջև։ Մենք ձգտում ենք հավասարակշռել կարճաժամկետ հնարավորությունները և երկարաժամկետ համոզմունքները՝ պահպանելով փոքր-ինչ դրական դիրքորոշում ռիսկի նկատմամբ և դիվերսիֆիկացված մոտեցում։ Մենք նաև կարծում ենք, որ ոսկին ոչ միայն աշխարհաքաղաքական ռիսկերի նկատմամբ դիվերսիֆիկացնող գործիք է, այլև՝ կենտրոնական բանկերի քաղաքականության անորոշության դեմ հեջավորման միջոց։

ՖԻՔՍՎԱԾ ԵԿԱՄՈՒՏ

Ժամկետայնություն  (դյուրացիա)․ պակաս ուղղորդված, առավել մանրամասնեցված մոտեցում

Ամորի Դորսեյ

Ֆիքսված եկամտաբերությամբ ներդրումային գործիքների գծով ղեկավար

Կենտրոնական բանկերի քաղաքականության վրա հիմնված շուկայական գնագոյացումը փոխվել է՝ պատերազմի սկզբում ակնկալվող փոքր տոկոսադրույքային նվազեցումներից անցնելով ներկայում տոկոսադրույքների բարձրացման սպասումների, հատկապես ԵԿԲ-ի և Անգլիայի բանկի պարագայում։ Թեև մենք ընդունում ենք գնաճային մտահոգությունները, որոնք հանգեցրել են այս վերագնահատմանը, որոշ դեպքերում, օրինակ՝ ՄԹ պետական պարտատոմսերի շուկայում, համաձայն չենք այդ վերագնահատման մասշտաբի հետ։ Մենք նաև կարծում ենք, որ պետական պարտատոմսերի առաջարկն ընդհանուր առմամբ կարող է զգալիորեն աճել, ինչը կարող է ճնշում գործադրել եկամտաբերությունների վրա։

Հետևաբար, հստակ ուղղորդված խոշոր խաղադրույքներ կատարելու փոխարեն, նախընտրում ենք պահպանել ընտրողական մոտեցում եկամտաբերության կորերի տարբեր հատվածներում և որոնել հավելյալ եկամտաբերություն կորպորատիվ վարկերում և զարգացող շուկաներում։ Վերջիններս ցուցաբերել են դիմակայունություն աշխարհաքաղաքական լարվածության պայմաններում։ Դրանք շարունակում են առաջարկել բարձր եկամտաբերության առավելություն, ներառյալ՝ շահութաբեր հատվածում, սակայն հիմնական ռիսկերից մեկը Մերձավոր Արևելքում ծայրահեղ սրացման հավանականությունն է (թեև դա մեր բազային սցենարը չէ)։

Ժամկետայնության (դյուրացիա) ու եկամտաբերության կորեր

• Ընդհանուր առմամբ շարունակում ենք պահպանել դրական դիրքորոշում ժամկետայնության նկատմամբ։ ԱՄՆ-ում ժամկետայնության նկատմամբ մեր դիրքորոշումը բարձրացրել ենք մինչև չեզոք մակարդակ՝ հիմնականում կարճ և միջին ժամկետայնությամբ պարտատոմսերի հատվածում, քանի որ հարկաբյուջետային ռիսկերը ճնշում են գործադրում տոկոսադրույքների վրա։ Մենք դրական ենք գնահատում գնաճին կապակցված պարտատոմսերը։

• Եվրագոտում նախապատվությունը տալիս ենք 2տ–5տ, համեմատած 30տ ռազմավարություններին և եկամտաբերության կորի կարճ հատվածին, միաժամանակ շարունակելով ԵՄ ռիսկային պարտատոմսերը դիտարկել որպես հարաբերականորեն գրավիչ, թեև ներկայիս մակարդակներում՝ ավելի սահմանափակ չափով։

• ՄԹ-ում մենք բարձրացրել ենք մեր դիրքորոշումը ժամկետայնության նկատմամբ՝ հիմնականում կորի կարճ հատվածում, մինչդեռ Ճապոնիայի նկատմամբ նվազեցրել ենք մեր դիրքորոշումը և շարունակում ենք նախապատվությունը տալ եկամտաբերության կորի հարթեցմանը։

Վարկեր 

• Ընդհանուր առմամբ շարունակում ենք պահպանել դրական դիրքորոշում ՆԴ վարկի նկատմամբ։ Մենք նաև ընտրողաբար դիտարկում ենք ԱՄՆ շուկան և նախապատվությունը տալիս կորի կարճ և միջին հատվածի ժամկետայնություններին, ընդ որում՝ ստորադաս պարտքը նախընտրելով ԲԵ վարկերից։

• Եվրոպական ՆԴ հատվածում նախապատվությունը տալիս ենք BBB/BB վարկանիշ ունեցող ընտրված վարկերին և ֆինանսական հատվածին՝ միաժամանակ պահպանելով պաշտպանական մեխանիզմներ վարկային և տոկոսադրույքային ռիսկերի նկատմամբ։ Մենք նաև շարունակում ենք նախապատվությունը տալ 2-ամյա ժամկետայնություններին։

• Մենք շարունակում ենք պահպանել փոքր-ինչ զգուշավոր դիրքորոշում ԲԵ վարկի նկատմամբ, որտեղ գնահատականները թվում են արդարացված, իսկ տեխնիկական գործոնները՝ աջակցող, սակայն ոլորտների և վարկանիշների շրջանակում ընտրողական մոտեցումը շարունակում է առանցքային նշանակություն ունենալ։

Զարգացող շուկաների պարտատոմսեր ու արտարժույթ 

• Տարածաշրջանային առումով նախապատվությունը տալիս ենք Լատինական Ամերիկային։ Բրազիլիայի, Արգենտինայի և Մեքսիկայի պես երկրներն ավելի դիմակայուն են՝ հաշվի առնելով նավթի և գազի ոլորտների, ինչպես նաև գյուղատնտեսական հումքային ապրանքների նկատմամբ նրանց ազդեցությունը։

• ՏԱ վարկի հատվածում շարունակում ենք պահպանել դրական դիրքորոշում, հատկապես Բրազիլիայի, Հարավային Աֆրիկայի և Հունգարիայի նկատմամբ, և ուսումնասիրում ենք հնարավորություններ այն հատվածներում, որտեղ վաճառքի ալիքը եղել է չափազանցված։

• Մեզ գրավում են զարգացող շուկաների բարձր եկամտաբերության առավելություն առաջարկող արժույթները, ինչպիսիք են Բրազիլիայի, Մեքսիկայի և Հարավային Աֆրիկայի արժույթները, ինչպես նաև սահմանային շուկաների ընտրված երկրները։

• Զարգացած շուկաների արտարժութային հատվածում մենք պահպանում ենք ԱՄՆ դոլարի նկատմամբ մեր կառուցվածքային զգուշավոր դիրքորոշումը, սակայն մարտավարական առումով ներկայումս չեզոք ենք։

ԲԱԺՆԵՏՈՄՍԵՐ  

Շուկաներն արագ հանգուցալուծում են ակնկալում  

Բարրի Գլավին

Բաժնետոմսերի հարթակի ղեկավար 

Բաժնետոմսերի շուկաների վարքագծի կտրուկ փոփոխությունը վկայում է ճգնաժամի արագ հանգուցալուծման շուրջ լավատեսության մասին, սակայն իրական զարգացումները կարող են ավելի բարդ լինել, նույնիսկ ժամանակավոր հրադադարի պարագայում։ Այս ճգնաժամը չի փոխում Եվրոպայի, Ճապոնիայի և զարգացող շուկաների (այդ թվում՝ Լատինական Ամերիկայի և զարգացող Ասիայի) վերաբերյալ մեր կառուցվածքային համոզմունքները, սակայն մենք ընդունում ենք կարճաժամկետ տատանողականության հավանականությունը։ Բացի դրանից, այս ճգնաժամը մեզ ստիպում է պահպանել զգոնություն՝ մեր երկարաժամկետ համոզմունքների շրջանակում դիմակայունության օջախներ որոնելիս, հատկապես այն հատվածներում, որտեղ շուկայական շարժերը եղել են չափազանցված։

Երկրորդ, այժմ մենք առավել հավանական ենք համարում շուկայի հատվածների տարբեր ուղղություններով շարժը, քան ամբողջ շուկայի միասնական լայն ուղղությունը։ Եվրոպայի դեպքում մենք տեսնում ենք տարածաշրջանում կապիտալ ծախսումների աճից և ռազմավարական ինքնավարության խթանումից երկրորդային շահառուներ։ Ի վերջո, արհեստական բանականության ոլորտում շուկաներն այժմ արդարացիորեն կենտրոնացած են ներդրումների դրամայնացման, հնացման ռիսկերի և մեկ բաժնետոմսին բաժին ընկնող շահույթի ապահովման վրա։

Զարգացած շուկաներ

Մենք շարունակում ենք կենտրոնանալ երկարաժամկետ հնարավորությունների վրա, հատկապես Եվրոպայում, Ճապոնիայում և զարգացող շուկաներում, որոնք շարունակում են պահպանել գրավչությունը՝ չնայած նավթի գների նկատմամբ իրենց զգայունությանը։ Նախապատվությունը տալիս ենք բանկերին, որոնց բաժնետերերի եկամտաբերությունը բարելավվում է, արդյունաբերական ընկերություններին, որոնք շահում են էներգաարդյունավետության, ավտոմատացման և արհեստական բանականության ոլորտներում կապիտալ ծախսումների աճից (օրինակ՝ տվյալների մշակման կենտրոններ), ինչպես նաև սպառողական հիմնական ապրանքների ոլորտի ընտրված ընկերություններին։

Եվրոպայում բարեփոխումների իրականացման, արդյունավետության բարձրացման և էլեկտրաֆիկացման արագացման ուղղությամբ ջանքերը թափ են հավաքում։ Նախապատվությունը տալիս ենք այն բաժնետոմսերին, որոնք շահում են այս միտումներից, ինչպես նաև ընտրված միջին կապիտալիզացիայով ընկերություններին, որոնց գնահատականները մոտ են պատմական նվազագույն մակարդակներին։

Ճապոնիայում մեր ներդրումային թեզի առանձնահատուկ շարժիչ գործոնները (օրինակ՝ կորպորատիվ բարեփոխումների օրակարգը) ներկայիս միջավայրում դառնում են առավել գրավիչ։

Զարգացող շուկաներ

• Մենք ավելի ընտրողական մոտեցում ենք ցուցաբերում զարգացող շուկաների նկատմամբ և նախապատվությունը տալիս առանձնահատուկ ռիսկեր ունեցող հնարավորություններին։ Զարգացող շուկաների կտրուկ վերականգնումը վկայում է այն մասին, թե որքան արագ շուկաները կարող են փոխել իրենց գնահատականները։ Մենք շարունակում ենք կենտրոնանալ հիմնարար ցուցանիշների, գնահատումների, սպառման աճի պատմության և արտաքին ֆինանսական դիրքերի վրա, որոնք շարունակում են գրավիչ մնալ բազմաթիվ տարածաշրջաններում, ներառյալ՝ Լատինական Ամերիկայում։ Մյուս կողմից, ճգնաժամը մեզ դրդել է նվազեցնել մեր դիրքորոշումն այնպիսի երկրների նկատմամբ, ինչպիսին ԱՄԷ-ն է, մինչդեռ Հարավային Աֆրիկայի նկատմամբ շարունակում ենք պահպանել դրական մոտեցումը։

• Ասիան պետք է շահի տեխնոլոգիական և կիսահաղորդիչների ցիկլից։ Երկրի մակարդակում Հարավային Կորեայի ընտրված ընկերությունները կշահեն հիշողության չիպերի նկատմամբ բարձր պահանջարկից, հատկապես ԱՄՆ և Չինաստանի ընկերությունների կողմից։ Չինաստանում ՀՆԱ-ի աճի վերջին տվյալները դիմակայուն էին, իսկ երկիրը նաև ունի էներգակիրների զգալի պաշարներ։ Թեև ներկայումս պահպանում ենք չեզոք դիրքորոշում, շարունակելու ենք պահպանել զգոնությունը։

ԲԱԶՄԱԱԿՏԻՎՆԵՐ (MULTI-ASSET)

Ակտիվ մոտեցում․ շուկայական անհավասարակշռությունից հնարավորությունների իրացում 

Ֆրանչեսկո Սանդրինի

Խաչաձև ակտիվների ռազմավարության գծով ստորաբաժանման ղեկավար

Ջոն Օթուլ

Խաչաձև ակտիվների ներդրումների գծով լուծումների ստորաբաժանման ղեկավար

Քանի դեռ ճգնաժամը շարունակվում է, մենք նայում ենք առաջ՝ ուշադրություն դարձնելով հումքային նյութերի բարձր գների և մատակարարման խափանումների ազդեցությանը կորպորատիվ մարժաների և սպառողական գնաճի վրա։ Երկարաժամկետ գնաճի ակնկալիքները 2022 թվականի պես չեն վերանայվել, ինչը ցույց է տալիս, որ ցնցումն ավելի շատ վերաբերում է աճին և ծախսերին, քան գնաճային ռեժիմի կառուցվածքային փոփոխությանը։ Շուկայի առումով սա մեզ թույլ է տալիս մնալ ակտիվ և մարտավարական, հատկապես այն ոլորտներում, որտեղ գնահատումները նախկինից ավելի դրական չեն, և որտեղ հիմնարար ցուցանիշները մնում են ամուր։ Ուստի, մենք մարտավարական առումով բարձրացրել ենք բաժնետոմսերի նկատմամբ մեր դիրքորոշումը։ Հաշվի առնելով շարունակվող աշխարհաքաղաքական և տնտեսական ռիսկերը, մեր կարծիքով, սա հարմար պահ է պաշտպանական միջոցառումներն ուժեղացնելու և լավ դիվերսիֆիկացված դիրքորոշում պահպանելու համար։ 

Բաժնետոմսերի շուկայում, վերջին շաբաթների կտրուկ տատանողականությունից հետո, մենք մարտավարական առումով բարձրացրել ենք մեր դիրքորոշումը S&P 500-ի և Լատինական Ամերիկայի նկատմամբ։ Այս շուկաներն առաջարկում են առավել գրավիչ ռիսկ/եկամտաբերություն հարաբերակցություն, ունեն շահույթի կանխատեսումների կայուն վերանայումներ և, Լատինական Ամերիկայի դեպքում, շարունակում են արձանագրել օտարերկրյա կապիտալի ներհոսքեր։ Բացի դրանից, դրանք կախված չեն էներգակիրների ներմուծումից։

Ժամկետայնությունը (դյուրացիա) շարունակում է պահպանել գրավչությունը, մասնավորապես՝ ԱՄՆ 5-ամյա և գերմանական պարտատոմսերի պարագայում։ Կարևոր է նշել, որ մենք բարձրացրել ենք մեր դրական գնահատականը BTP-Bund սփրեդի նկատմամբ, որն Իրանի հետ կապված լարվածության սրացումից հետո էականորեն ընդլայնվել է՝ դարձնելով առաջարկվող եկամտաբերությունն առավել գրավիչ։ Իտալիայում հանրաքվեի ավարտից և կառավարության կայունացումից հետո ակնկալվում է տատանողականության նվազում և սփրեդների կայունացում։ Բացի դրանից, Իտալիայի բյուջետային դեֆիցիտի վերաբերյալ մտահոգությունները սահմանափակ են՝ համեմատած եվրոպական այլ երկրների հետ։

Արտարժույթի շուկան շարունակում է մնալ մեր բազմաակտիվ ռազմավարության առանցքային բաղադրիչներից մեկը, որտեղ մենք երկարաժամկետ հեռանկարում պահպանել ենք զգուշավոր մոտեցում ԱՄՆ դոլարի նկատմամբ։ Վերջին շարժերից հետո մենք նվազեցրել ենք մեր դրական գնահատականը NOK/EUR փոխարժեքի վերաբերյալ։ Արժույթը շարունակում է պահպանվել Նորվեգիայի էներգետիկ ոլորտի ազդեցությամբ՝ պայմանավորված անորոշ աշխարհաքաղաքական միջավայրով։ Բացի դրանից, մենք EUR/USD-ի նկատմամբ դրական դիրքորոշումը տեղափոխել ենք AUD/USD։ Ի վերջո, մենք մարտավարական առումով նվազեցրել ենք զարգացող շուկաների արժույթների նկատմամբ դիրքորոշումը՝ հասցնելով այն չեզոք մակարդակի։

ՀԵՌԱՆԿԱՐՆԵՐ

Ակտիվների դասերի վերաբերյալ Ամունդի դիրքորոշում 

ԿԱՐԵՎՈՐ ՏԵՂԵԿՈՒԹՅՈՒՆ

ՄՍՄԿ-ի տեղեկությունները կարող են գործածվել միայն Ձեր ներքին օգտագործման համար, չեն կարող վերարտադրվել կամ տարածվել որևէ ձևով և չեն կարող գործածվել որպես որևէ ֆինանսական գործիքի կամ պրոդուկտի կամ ինդեքսի հիմք կամ դրա բաղադրիչ։ ՄՍՄԿ-ի որևէ տեղեկություն նախատեսված չէ լինելու ներդրումային խորհրդատվություն կամ որևէ տեսակի ներդրումային որոշում կայացնելու (կամ դրանից զերծ մնալու) առաջարկություն, և դրա վրա չի կարելի հիմնվել որպես այդպիսին։ Պատմական տվյալները և վերլուծությունը չպետք է ընկալվեն որպես որևէ հետագա կատարողականի վերլուծության, կանխատեսման կամ կանխագուշակման մասին նշում կամ երաշխիք։ ՄՍՄԿ-ի տեղեկությունները տրամադրվել են «այնպես, ինչպես կա» հիմքով, և սույն տեղեկություններն օգտագործողն ստանձնում է սույն տեղեկությունների ցանկացած օգտագործման բոլոր ռիսկերը։ ՄՍՄԿ-ն, դրա փոխկապակցված անձինք և յուրաքանչյուր անձ, որը ներգրավված է ՄՍՄԿ-ի որևէ տեղեկություն կազմելուն կամ կապված է դրա հետ (միասին «ՄՍՄԿ կողմեր»), սույն տեղեկությունների մասով բացահայտ հրաժարվում է բոլոր երաշխիքներից (այդ թվում, առանց սահմանափակման, բնօրինակության, ճշգրտության, ամբողջականության, ժամանակին լինելու, խախտում չկատարելու, վաճառքի համար պիտանիության և կոնկրետ նպատակին համապատասխանության վերաբերյալ ցանկացած երաշխիքից)։ Չսահմանափակելով վերոնշյալ որևէ դրույթ, ՄՍՄԿ որևէ կողմ որևէ դեպքում չի կրում որևէ պատասխանատվություն որևէ ուղղակի, անուղղակի, հատուկ, պատահական, պատժիչ, հետևանքային (այդ թվում, առանց սահմանափակման, բաց թողնված օգուտի) կամ որևէ այլ վնասի համար։ (www.mscibarra.com)։ 

SM արդյունաբերությունների դասակարգման համաշխարհային ստանդարտը (ԱԴՀՍ) մշակվել է «Ստենդրդ ընդ Փուրզ»-ի և ՄՍՄԿ-ի կողմից և դրանց բացառիկ սեփականությունն ու ծառայությունների ապրանքանիշն է։ Ոչ «Ստենդրդ ընդ Փուրզ»-ը, ՄՍՄԿ-ն և ոչ էլ ԱԴՀՍ որևէ դասակարգում մշակելուն կամ կազմելուն ներգրավված որևէ այլ կողմ որևէ բացահայտ կամ ենթադրյալ երաշխիք կամ հավաստիացում չի տալիս այդ ստանդարտի կամ դասակարգման (կամ դրանց օգտագործումից ստացվելիք արդյունքի) վերաբերյալ, և այդ բոլոր կողմերը սույնով բացահայտ հրաժարվում են ցանկացած այդպիսի ստանդարտի կամ դասակարգման առնչությամբ բնօրինակության, ճշգրտության, ամբողջականության, վաճառքի համար պիտանիության կամ կոնկրետ նպատակին համապատասխանության վերաբերյալ ցանկացած երաշխիքից։ Չսահմանափակելով վերոնշյալ որևէ դրույթ, «Ստենդրդ ընդ Փուրզ»-ը, ՄՍՄԿ-ն, դրան որևէ փոխկապակցված անձ կամ ԱԴՀՍ որևէ դասակարգում մշակելուն կամ կազմելուն ներգրավված որևէ երրորդ կողմ որևէ պատասխանատվություն չի կրում որևէ ուղղակի, անուղղակի, հատուկ, պատժիչ, հետևանքային կամ որևէ այլ վնասի (այդ թվում՝ բաց թողնված օգուտի) համար, նույնիսկ եթե ծանուցվել է այդ վնասների հնարավոր լինելու մասին։

Սույն փաստաթուղթը նախատեսված է միայն տեղեկատվական նպատակների համար: Սույն փաստաթուղթը չի  հանդիսանում վաճառքի առաջարկ, գնման առաջարկի հրավեր կամ որևէ արժեթղթի կամ որևէ այլ պրոդուկտի կամ ծառայության առաջարկություն։ Ցանկացած արժեթուղթ, պրոդուկտ կամ ծառայություն, որին հղում է կատարվում, կարող են գրանցված չլինել Ձեր պետությունում համապատասխան մարմնի կողմից վաճառքի համար և կարող են չկարգավորվել կամ չվերահսկվել Ձեր պետությունում որևէ պետական կամ համանման մարմնի կողմից։ Այս փաստաթղթում պարունակվող տեղեկատվությունը չպետք է փոփոխվի կամ ներկայացվի այնպես, որ առաջացնի թյուրընկալումներ կամ սխալ հավաստիացումներ։ Փաստաթղթի բովանդակության ցանկացած օգտագործում, վերարտադրում կամ տարածում առանց ամբողջական և պատշաճ հղման սկզբնաղբյուրին արգելվում է։ Սույն փաստաթղթում պարունակվող ցանկացած տեղեկություն չի կարող օգտագործվել որպես որևէ ֆինանսական գործիքի կամ պրոդուկտի կամ ինդեքսի հիմք կամ դրա բաղադրիչ։ Ավելին, ոչինչ սույն փաստաթղթում նախատեսված չէ հարկային, իրավական կամ ներդրումային խորհրդատվություն տրամադրելու համար։ Եթե այլ բան նշված չէ, ապա սույն փաստաթղթում պարունակվող բոլոր տեղեկություններն ստացվել են «Ամունդի Ասեթ Մենեջմենթ ԷսԱԷս» ընկերությունից և ներկայաված են 2026 թվականի ապրիլի 23-ի դրությամբ։ Դիվերսիֆիկացիան չի երաշխավորում շահույթ կամ չի պաշտպանում կորուստից։ Սույն փաստաթուղթը տրամադրվել է «այնպես, ինչպես կա» հիմքով, և սույն տեղեկություններն օգտագործողն ստանձնում է սույն տեղեկությունների ցանկացած օգտագործման բոլոր ռիսկերը։ Պատմական տվյալները և վերլուծությունը չպետք է ընկալվեն որպես որևէ հետագա կատարողականի վերլուծության, կանխատեսման կամ կանխագուշակման մասին նշում կամ երաշխիք։ Շուկայի և շուկայի միտումների վերաբերյալ արտահայտված տեսակետները հեղինակի տեսակետներն են և պարտադիր չէ, որ լինեն «Ամունդի Ասեթ Մենեջմենթ ԷսԱԷս» ընկերության կամ Ամունդի-Ակբա Ասեթ Մենեջմենթ ՓԲԸ-ի տեսակետներ ու ցանկացած պահի ենթակա են փոփոխության՝ շուկայի և այլ պայմանների հիման վրա, և չեն կարող լինել հավաստիացումներ առ այն, որ երկրները, շուկաները կամ ոլորտները կհամապատասխանեն ակնկալիքներին։ Սույն տեսակետները պետք չէ հիմք ընդունել որպես ներդրումային խորհրդատվություն, արժեթղթի առաջարկություն կամ «Ամունդի» ընկերության կամ Ամունդի-Ակբայի որևէ պրոդուկտի առքուվաճառքի մասին նշում։ Ներդրումը ներառում է ռիսկեր, այդ թվում՝ շուկայական, քաղաքական, իրացվելիության և արժույթի հետ կապված ռիսկեր։ Ավելին, «Ամունդին» կամ Ամունդի-Ակբան որևէ դեպքում չեն կրում որևէ պատասխանատվություն դրա հետևանքով առաջացած որևէ ուղղակի, անուղղակի, հատուկ, պատահական, պատժիչ, հետևանքային (այդ թվում, առանց սահմանափակման, բաց թողնված օգուտի) կամ որևէ այլ վնասի համար։

Առաջին օգտագործման ամսաթիվը՝ 2026թ. ապրիլի 23։ 

«Ամունդի-Ակբա Ասեթ Մենեջմենթ» ՓԲԸ-ն իրավաբանական անձ է, որը գրանցված է Հայաստանի Հանրապետությունում և Հայաստանի Կենտրոնական բանկի կողմից տրամադրած ներդրումային ֆոնդերի կառավարման թիվ 0002-ի լիցենզիայի հիման վրա, Հայաստանի Հանրապետությունում իրականացնում է պարտադիր կենսաթոշակային ֆոնդերի կառավարում։ Գրանցված գրասենյակը գտնվում է Երևան, Վազգեն Սարգսյան 10, 100-101 տարածք։  

Ամունդի-Ակբայի մասին ավելին իմանալու համար կարող եք այցելել www.amundi-acba.am կամ զանգահարել 011-310-000։