Շուկաների հակասական ազդակները 

Անցած ամսվա ընթացքում բաժնետոմսերի և պարտատոմսերի շուկաները ձևավորվել են հակասական գործոնների ազդեցությամբ։ Պարտատոմսերի եկամտաբերությունները կարճ ժամկետայնության հատվածում աճել են գնաճային ճնշումների և կենտրոնական բանկերի ավելի խիստ դիրքորոշման պատճառով, իսկ երկարաժամկետ հատվածում եկամտաբերությունները բարձրացել են ժամկետային հավելավճարների աճի հետևանքով՝ պայմանավորված Մերձավոր Արևելքում առկա անորոշությամբ և շարունակվող բարձր բյուջետային պակասուրդներով։ 

Մյուս կողմից, բաժնետոմսերի շուկաների վրա պատերազմի ազդեցությունն ավելի թույլ է եղել։ Շուկաները վերականգնվել են մարտ ամսվա նվազագույն մակարդակներից, թեև աճը հիմնականում պայմանավորված է եղել մի քանի ուղղություններով (էներգետիկա, գերխոշոր կապիտալով ընկերություններ, հիշողության չիպեր), արհեստական բանականության (ԱԲ) հետ կապված սահմանափակ թվով ընկերությունների առկայությամբ և արտադրողականության հնարավոր աճի ակնկալիքներով, որոնք, մեր կարծիքով, կդրսևորվեն միայն երկարաժամկետ հեռանկարում։ 

Մեր գնահատմամբ՝ պարտատոմսերի և բաժնետոմսերի շուկաների միջև առկա տարբեր պատմույթները վկայում են այն մասին, թե որքան դժվար է գնահատել Հորմուզի նեղուցով երթևեկության խաթարման ազդեցությունը։ Ի լրումն, դրանք ընդգծում են երկրորդային տնտեսական ալիքների շուրջ անորոշությունը, այսինքն՝ էներգետիկ և լոգիստիկ ոլորտներում առկա ճգնաժամի ազդեցությունը գնաճի, տնտեսական աճի, ընկերությունների շահութաբերության ցուցանիշների վրա, ինչպես նաև բիզնեսի և սպառողների վստահության նկատմամբ։ 

• Մեր հիմնական սցենարը չափավոր դանդաղումից տեղափոխվել է դեպի տնտեսության կառավարվող խաթարման սցենար, ինչը ենթադրում է 2026 թվականին խոշոր տնտեսությունների աճի վերաբերյալ ավելի ցածր ակնկալիքներ և տարածաշրջանային տարբերությունների շարունակություն։ 

• Եվրոպան և էներգիայի ներմուծումից կախված զարգացող շուկաներն առավել խոցելի են։ Չենք բացառում, որ Եվրոգոտու (ԵԳ) որոշ երկրներում այս տարի կարող է գրանցվել ստագնացիա, ինչպես նաև տեսնում ենք տնտեսական աճի դանդաղման ռիսկեր Հարավային Ասիայի որոշ հատվածներում։ ԱՄՆ տնտեսությունը համեմատաբար ավելի պաշտպանված է, սակայն շարունակում է խոցելի մնալ ֆինանսական և վստահության փոխանցման ուղիներով։ Տնտեսական աճի հարցում էական ազդեցություն պետք է ունենան կապիտալ ծախսերը, հիմնականում տեխնոլոգիական ոլորտներին առնչվող ուղղություններում (թեև ոչ միայն), իսկ հարկային կրճատումները բիզնեսների համար նաև որոշակի լրացուցիչ պաշտպանություն են ապահովում աշխարհաքաղաքական ռիսկերի նկատմամբ։ 

• Էներգետիկ ցնցման փոխանցումը տնտեսության ավելի լայն հատվածներին պահանջում է առավել մանրակրկիտ ուսումնասիրություն՝ գնաճային ռիսկերի ընդլայնման պայմաններում։ Ակնկալվում է, որ ընդհանուր գնաճը կբարձրանա, իսկ բնականոն գնաճը կհետևի որոշակի ուշացումով, հատկապես այն տնտեսություններում, որտեղ էներգակիրների գների փոխանցման ու աշխատավարձերի ազդեցությունը և հարկաբյուջետային աջակցության միջոցներն ավելի ուժեղ են։ Գլխավոր ռիսկը կայանում է ոչ միայն սկզբնական էներգետիկ ցնցման մեջ, այլև դրա տևողության և երկրորդական ազդեցությունների մեջ։ Էներգիայի զուտ ներմուծող երկրները (Եվրոպայում և Ասիայում) հատկապես խոցելի են այս առումով։ 

• ԱՄՆ-ում կորպորատիվ շահույթների վերաբերյալ հաշվետվությունների սեզոնն ավելի է խորացնում արհեստական բանականության թեման։ Վերջին հաշվետու ժամանակաշրջանն ընդհանուր առմամբ դրական և բացառիկ արդյունքներ է գրանցել ԱՄՆ-ում։ Արհեստական բանականության հետ առնչվող ընկերությունները ներկայացրել են ուժեղ ֆինանսական արդյունքներ, սակայն դրական անակնկալների զգալի մասը պայմանավորված է եղել մասնավոր ներդրումներից չիրացված շահույթներով և խոշոր կապիտալ ծախսերի հաշվապահական արտացոլմամբ։ Այս գործոնները նպաստել են ընթացիկ եռամսյակի արդյունքների բարելավմանը, սակայն դեռևս հստակ չէ, թե արդյոք այդ ներդրումները կապահովեն ակնկալվող երկարաժամկետ եկամտաբերությունը՝ հաշվի առնելով տեխնոլոգիական բացերի, Չինաստանի կողմից աճող մրցակցության և կիբեռանվտանգության խնդիրների հետ կապված ռիսկերը։ 

Ամփոփելով՝ կարևոր է նշել, որ Մերձավոր Արևելքում տեղի ունեցող ցնցումն այժմ պետք է դիտարկել ոչ թե որպես ժամանակավոր իրադարձություն, այլ որպես շարունակական ռիսկային միջավայր։ Առաջիկայի հիմնական հարցն այն է, թե արդյոք այդ ցնցումը կմնա կառավարելի, թե կվերածվի մակրոտնտեսական և ֆինանսական ցնցման։ 

Հետևաբար, անորոշությունը շարունակում է բարձր մնալ, ինչը մեծացնում է տնտեսական հետևանքների մանրակրկիտ մշտադիտարկման անհրաժեշտությունը՝ ակտիվների բաշխման հաջորդ քայլը գնահատելու նպատակով։ Այս պահին, երբ իրացվելիության պայմանները և հիմնարար գործոնները շարունակում են նպաստավոր լինել ռիսկային ակտիվների մասով, մենք պահպանում ենք զգուշավոր «ռիսկի ընդունման» դիրքորոշում՝ միաժամանակ ուժեղացնելով պաշտպանության մեխանիզմները։  

Ամունդի ներդրումային ինստիտուտ: Կենտրոնական բանկերի արձագանքման գործառույթների փոփոխության ազդանշան։ 

Կենտրոնական բանկերն իրենց վերջին նիստերի ընթացքում որդեգրել են ավելի խիստ դիրքորոշում։ Այս տարվա համար սահուն դրամավարկային մեղմացման մոտեցումն այլևս հիմնական սցենար չէ, սակայն մեղմացման ուղղվածություն կարող է կրկին ի հայտ գալ ավելի ուշ, եթե գնաճը վերադառնա նպատակային մակարդակներին։ ԵԿԲ-ի դեպքում այժմ ակնկալում ենք այս տարի 25 բազիսային կետով երկու բարձրացում, սակայն բացառում ենք տոկոսադրույքների բարձրացման ամբողջական փուլը։ Անգլիայի բանկի (ԱԲ) համար կանխատեսվում է մեկ բարձրացում մինչև 2026 թվականի վերջը, իսկ մեր ակնկալվող մեղմացման ուղղվածությունը տեղափոխել ենք 2027 թվականի երկրորդ եռամսյակ, քանի որ Միացյալ Թագավորությունում գնաճի դինամիկան կարճաժամկետ հեռանկարում շարունակում է մտահոգիչ մնալ։ Դաշնային պահուստը ներկայումս գտնվում է դիտորդի կարգավիճակում, և մենք ակնկալում ենք, որ այն երկար ժամանակ կպահպանի տոկոսադրույքներն անփոփոխ՝ չվերսկսելով դրանց իջեցումը մինչև 2027 թվականի երկրորդ եռամսյակը, երբ գնաճի թուլացման միտումն ավելի ակնհայտ կդառնա։ Ինչ վերաբերում է Ճապոնիայի բանկին (ՃԲ), մենք շարունակում ենք ակնկալել տոկոսադրույքի բարձրացում այս տարվա հունիսին և ավելացրել ենք ևս մեկ բարձրացում 2026 թվականի չորրորդ եռամսյակի համար, ինչը կնվազեցնի իրական տոկոսադրույքների տարբերությունը մյուս զարգացած շուկաների համեմատ։ 

Զարգացող շուկաներում դրամավարկային քաղաքականության տարբերությունները կխորանան։ Էներգիա ներմուծող խոցելի երկրները, այդ թվում՝ Հնդկաստանը, սահմանափակ հնարավորություններ ունեն տոկոսադրույքները նվազեցնելու համար (չնայած տնտեսական աճի թուլացող տեմպին), քանի որ նավթի գների նկատմամբ զգայունությունը, արտարժույթի շուկայի ճնշումները և գնաճային քաղաքականության նկատմամբ վստահությունը կդառնան առավել կարևոր գործոններ։ Չինաստանի ժողովրդական բանկը, ամենայն հավանականությամբ, կշարունակի աջակցող քաղաքականությունը, սակայն կենտրոնացած կլինի իրացվելիության և վարկավորման խթանման վրա, այլ ոչ թե տոկոսադրույքների ագրեսիվ նվազեցումների։

«Կենտրոնական բանկերն այլևս չեն ազդարարում այս տարվա ընթացքում սահուն դրամավարկային մեղմացման փուլ, թեև հաջորդ տարի որոշ պայմանների դեպքում կարող է վերադառնալ մեղմացման ուղղվածությունը։ Բացի դրանից, նրանք նախապես միջոցներ չեն ձեռնարկի աճը խթանելու համար, սակայն կխուսափեն չափից ավելի խիստ քաղաքականություն կիրառելուց, եթե ցնցումները ճնշեն պահանջարկը»։ 

Մոնիկա Դեֆենդ 
Ամունդի ներդրումային ինստիտուտի ղեկավար

Եկամտաբերության կայուն աճի, վերահսկելի լարվածության և շուկայական իրացվելիության ընդունելի պայմանների ֆոնին մենք շարունակում ենք պահպանել չափավոր դրական վերաբերմունք ռիսկային ակտիվների նկատմամբ։ Մեր հիմնական համոզմունքներն ըստ ակտիվների դասերի ներկայացված են ստորև. 

• Ֆիքսված եկամտով գործիքներ. ժամկետայնության (Duration) ուղղությամբ ավելի վճռական դիրքորոշում որդեգրելու շուրջ անորոշությունն աճում է, ուստի մենք դառնում ենք առավել ընտրողական։ ԱՄՆ-ում ժամկետայնության նկատմամբ որդեգրել ենք փոքր-ինչ զգուշավոր մոտեցում, քանի որ տնտեսական աճը շարունակում է մնալ կայուն, իսկ հարկաբյուջետային ռիսկերը՝ պահպանվել են։ Եվրոպայում ավելի թույլ տնտեսական աճը և ԵԿԲ-ի զգուշավոր դիրքորոշումը կարճ և միջին ժամկետայնության պարտատոմսերը դարձնում են գրավիչ, թեև մենք շարունակում ենք զգուշավոր վերաբերմունք ցուցաբերել երկարաժամկետ հատվածի նկատմամբ։ Բարձրորակ պարտքային գործիքները շարունակում են առաջարկել գրավիչ եկամտաբերություններ, և մենք այժմ փոքր-ինչ դրական ենք տրամադրված ԱՄՆ ներդրումային դասի պարտքային գործիքների նկատմամբ, ինչպես նաև շարունակում ենք դրական գնահատել զարգացող շուկաների պարտքային գործիքները, հատկապես Լատինական Ամերիկայում։  

• Բաժնետոմսեր. Ընդհանուր առմամբ նախընտրում ենք հավասարակշռված դիրքորոշում՝ կենտրոնանալով կայուն և խաթարումներից նվազագույնն ազդվող բիզնես մոդելների, ինչպես նաև հաշվեկշռերի կայունության վրա։ Շարունակում ենք նախապատվություն տալ առաջնագծի հատվածների գրավիչ բաժնետոմսերին, ինչպիսիք են սպառողական առաջին անհրաժեշտության ապրանքների և դեղագործական ոլորտները, ինչպես նաև արդյունաբերական և հումքային ոլորտների բարձրորակ ցիկլային բաժնետոմսերին։  

• Բազմաակտիվների հարցում մենք շարունակում ենք պահպանել չափավոր դրական վերաբերմունք ռիսկային ակտիվների նկատմամբ՝ միաժամանակ մեծացնելով հեջավորման գործիքների նկատմամբ մեր նախապատվությունը։ Վերահաստատում ենք մեր մոտեցումն ԱՄՆ-ի և Լատինական Ամերիկայի բաժնետոմսերի նկատմամբ՝ զուգակցելով այն ԱՄՆ-ում և Եվրոպայում պաշտպանության միջոցների կիրառմամբ։ Ֆիքսված եկամտով գործիքների շրջանակում շարունակում ենք դրական գնահատել եվրոպական ներդրումային դասի կորպորատիվ պարտքային գործիքները և շուկայի տատանողականությունը դիտարկում ենք որպես մարտավարական հնարավորություններից օգտվելու հնարավորություն։

ՖԻՔՍՎԱԾ   ԵԿԱՄՈՒՏ

Տոկոսադրույքների դինամիկայի փոփոխությունը գնաճի պայմաններում

Ամորի Դորսեյ

Ֆիքսված եկամտաբերությամբ ներդրումային գործիքների գծով ղեկավար

Իրանի պատերազմի մեկնարկից ի վեր պարտատոմսերի շուկաները հայտնվել են մի շարք գործոնների համակցված ճնշման ներքո։ Գնաճային ճնշումները կրկին սկսել են ուժեղանալ, ինչի հետևանքով աճել են կարճաժամկետ տոկոսադրույքները, մինչդեռ տնտեսական աճի թուլացման և պետական աջակցության միջոցների ընդլայնման վերաբերյալ մտավախությունները, որոնք կարող են բացասաբար անդրադառնալ պետական ֆինանսների և պարտատոմսերի առաջարկի վրա, աճող ճնշում են գործադրել երկարաժամկետ տոկոսադրույքների վրա։ 

Այս գնաճային ճնշումները կենտրոնական բանկերին (ԵԿԲ, Անգլիայի բանկ) մղում են դեպի ավելի խիստ դիրքորոշում։ Մենք կարծում ենք, որ այս բանկերը կարող են բարձրացնել տոկոսադրույքները, սակայն առանց տոկոսադրույքների բարձրացման շարունակական փուլի մեկնարկի։ Հետևաբար, ընդհանուր առմամբ շարունակում ենք դրական գնահատել ժամկետայնությունը, սակայն տարբեր տարածաշրջանների և եկամտաբերության կորերի նկատմամբ որդեգրում ենք առավել ընտրողական մոտեցում։

Բացի դրանից, մենք պահպանում ենք եկամտաբերության կորերի թեքացման վերաբերյալ մեր ընդհանուր գնահատականը, սակայն ընդունում ենք, որ կարճաժամկետ հեռանկարում անորոշությունն ավելի բարձր է՝ պայմանավորված դրամավարկային քաղաքականության հետագա քայլերի շուրջ առկախությամբ։ 

Ժամկետայնության (Duration) ու եկամտաբերության կորեր

• ԵՄ-ում և ՄԹ-ում շարունակում ենք դրական գնահատել ժամկետայնությունը՝ հիմնականում կարճ և միջին ժամկետայնության հատվածներում։ Մասնավորապես, 2-ամյա պարտատոմսերն առաջարկում են գրավիչ եկամտաբերություններ։ Բացի դրանից, Եվրոպայում ավելի թույլ տնտեսական աճը և սահմանափակ հարկաբյուջետային աջակցությունը 2 և 5 տարի ժամկետայնությամբ պարտատոմսերը դարձնում են գրավիչ։  

• ԱՄՆ-ում տնտեսական աճի միտումներն ավելի բարենպաստ են, ինչի պատճառով փոքր-ինչ նվազեցրել ենք մեր դրական գնահատականն ԱՄՆ ժամկետայնության նկատմամբ։ ԱՄՆ եկամտաբերության կորի կարճաժամկետ հատվածը թանկ է գնահատվում, իսկ երկարաժամկետ հատվածը ենթակա է հարկաբյուջետային ռիսկերի ազդեցությանը։ Միևնույն ժամանակ, նախապատվությունը տալիս ենք գնաճով ինդեքսավորված պարտատոմսերին։ 

• Շարունակում ենք պահպանել զգուշավոր դիրքորոշում ճապոնական ժամկետայնության նկատմամբ։ 

Պարտքային գործիքներ 

• Ընդհանուր առմամբ շարունակում ենք դրական գնահատել պարտքային գործիքները՝ նախապատվությունը տալով Եվրոպային։ ԱՄՆ ներդրումային դասի պարտքային գործիքների նկատմամբ որդեգրել ենք փոքր-ինչ դրական դիրքորոշում, քանի որ ակնկալում ենք, որ դրանք կլինեն կայուն և համեմատաբար քիչ կազդվեն էներգետիկ և գնաճային ցնցումներից։ 

• Ոլորտային մակարդակում շարունակում ենք նախապատվությունը տալ ֆինանսական ոլորտին՝ ոչ ֆինանսականի համեմատ։  Միաժամանակ, դառնում ենք ավելի ընտրողական և եվրոպական արդյունաբերական ընկերությունների համեմատ նախընտրում ենք ամերիկյան արդյունաբերական ընկերությունները։

• Թեմատիկ տեսանկյունից շարունակում ենք նախապատվությունը տալ բարձրորակ եկամտաբերություն ապահովող գործիքներին՝ հիմնվելով սեղմ սպրեդների և բարենպաստ տեխնիկական գործոնների վրա, ինչպես նաև նախապատվությունը տալիս ենք ստորադաս պարտքային գործիքներին՝ բարձր եկամտաբերության պարտքային գործիքների համեմատ։ 

Զարգացող շուկաների պարտատոմսեր ու արտարժույթ 

• Շարունակում ենք դրական գնահատել զարգացող շուկաների պարտքային գործիքները՝ միաժամանակ պահպանելով չեզոք ընդհանուր դիրքորոշում և նախընտրելով պահպանել ճկունությունը՝ կոնկրետ դիրքեր ընդունելու փոխարեն։

• Նախապատվությունը տալիս ենք Լատինական Ամերիկայում առկա ընտրողական հնարավորություններին, մասնավորապես՝ Բրազիլիայում, ինչպես նաև հումքային ապրանքների հետ կապված ակտիվներին։ Բացի դրանից, գրավիչ ենք համարում Սահարայից հարավ ընկած Աֆրիկայի որոշ ինքնիշխան թողարկումներ կոշտ արժույթով պարտքային գործիքների հատվածում՝ հաշվի առնելով դրանց գնահատականները։

• Տեղական արժույթով պարտքային գործիքների և զարգացող շուկաների արժույթների դեպքում նախապատվությունը տալիս ենք ավելի բարձր եկամտաբերություն ապահովող շուկաներին, սակայն Ասիայի ավելի ցածր եկամտաբերությամբ հատվածների նկատմամբ ցուցաբերում ենք առավել ընտրողական մոտեցում։ 

ԲԱԺՆԵՏՈՄՍԵՐ 

Համաշխարհային հնարավորություններ, ավելի բարձր դիմակայունություն

Բարրի Գլավին

Բաժնետոմսերի հարթակի ղեկավար 

Շուկաների աճը պայմանավորված է եղել նավթի գների նվազմամբ, Մերձավոր Արևելքում համաձայնության ձեռքբերման ակնկալիքներով և արհեստական բանականության հետ կապված տեխնոլոգիական ընկերությունների շահույթներով։ Այնուամենայնիվ, հումքային ապրանքների պակասորդը հավանաբար կպահպանվի, իսկ գնաճային ճնշումները կշարունակեն բարձր մնալ կարճաժամկետ հեռանկարում։ Հետևաբար, մեր ուշադրության կենտրոնում շարունակում են լինել այն ընկերությունները, որոնք կարող են ապահովել շահույթի կայուն աճ և փոխանցել աճող ծախսերը սպառողներին՝ պահպանելով իրենց շահույթի մարժաները։

Մենք նման ընկերություններ ենք որոնում համաշխարհային մասշտաբով՝ առանձնահատուկ ուշադրություն դարձնելով Ճապոնիային (ռեֆլյացիայի պատմույթ), Եվրոպային և զարգացող շուկաներին։ 

Թեև այս տարածաշրջաններից որոշներում տրամադրությունները թուլացել են՝ պայմանավորված էներգիայի ներմուծումից դրանց կախվածությամբ, երկարաժամկետ ներդրումային հիմնավորումները շարունակում են պահպանվել։ Եվրոպայում այս ճգնաժամը երկարաժամկետ հեռանկարում կխթանի տարածաշրջանի շարժը դեպի ռազմավարական ինքնավարության ապահովում, ինչպես նաև էներգետիկ անվտանգության և մատակարարման շղթաների ամրապնդում։

Զարգացած շուկաներ 

• Ոլորտների միջև պահպանում ենք «ծանրաձողի» մոտեցումը՝ առանձնահատուկ ուշադրություն դարձնելով հաշվեկշիռների կայունությանը և գնահատականներին։ Օրինակ, նախապատվությունը տալիս ենք առաջնագծի գրավիչ ընկերություններին, ինչպիսիք են դեղագործական ընկերությունները։ Բացի դրանից, նախընտրում ենք արդյունաբերական և հումքային ոլորտների բարձրորակ ցիկլային ընկերությունները։

• Արդյունաբերական ոլորտում կենտրոնանում ենք արհեստական բանականության հետ կապված կապիտալ ծախսերից շահող ընկերությունների վրա, միաժամանակ հնարավորություններ տեսնելով բարձրորակ շինարարական ընկերությունների շրջանում։ Մեր ուշադրության կենտրոնում են նաև դեղագործական ընկերությունները, որոնք ունեն բազմազան և լավ զարգացած արտադրանքային պորտֆելներ։ Բանկային հատվածում նախապատվությունը տալիս ենք այն բանկերին, որոնց կապիտալի եկամտաբերությունը գտնվում է աճի փուլում։

• Տարածաշրջանային առումով նախապատվությունը տալիս ենք կորպորատիվ բարեփոխումների դեպքերին։ Օրինակ՝ Ճապոնիայում, որտեղ ընկերությունները կրճատում են խաչաձև բաժնեմասնակցությունները և ավելցուկային դրամական միջոցների ծավալը։ Մեզ գրավիչ է նաև Միացյալ Թագավորության շուկան՝ իր շահաբաժնային բնութագրերի շնորհիվ։

Զարգացող շուկաներ

• Զարգացող շուկաներին նպաստել է տեխնոլոգիական ընկերությունների շահույթի աճը, թեև դիմակայունության աստիճանը տարբեր երկրներում տարբեր է։ Էներգիա ներմուծող երկրները խոցելի են նավթի բարձր գների նկատմամբ, իսկ գնաճը զսպելու նպատակով սուբսիդիաներ կիրառելու նրանց հնարավորությունները նույնպես տարբեր են։ Ասիայում սարքավորումների արտադրությամբ զբաղվող ընկերությունների շահույթի աճը պայմանավորված է արհեստական բանականության հետ կապված հիշողության չիպերի կայուն պահանջարկով։ Այս շուկաները հնարավորություն են տալիս օգտվել արհեստական բանականության ուղղությունից՝ ԱՄՆ-ի համեմատ ավելի գրավիչ գնահատականներով։ Թեև ներկայումս Հնդկաստանի նկատմամբ պահպանում ենք չեզոք դիրքորոշում՝ նավթի գների նկատմամբ դրա զգայունության պատճառով, նախապատվությունը տալիս ենք սպառողական հատվածի որոշ ընտրովի բաժնետոմսերի։ Չինաստանի նկատմամբ նույնպես պահպանում ենք չեզոք դիրքորոշում։

• Լատինական Ամերիկայում, մասնավորապես Բրազիլիայում, շահույթի աճի ակնկալիքները բարելավվում են՝ բարձր հումքային գների շնորհիվ, սակայն քաղաքական անորոշությունն աճում է։ Զարգացող Եվրոպայում, Մերձավոր Արևելքում և Աֆրիկայում Հորմուզի նեղուցի շուրջ անորոշությունը մեզ դրդել է նվազեցնել մեր դրական գնահատականը տարածաշրջանի նկատմամբ։ Այնուամենայնիվ, տարածաշրջանը շարունակում է առաջարկել ընտրողական ներդրումային հնարավորություններ։

ԲԱԶՄԱԱԿՏԻՎՆԵՐ (MULTI-ASSET)

Չափավոր դրական վերաբերմունք ռիսկային ակտիվների նկատմամբ՝ ուժեղացված պաշտպանությամբ  

Ֆրանչեսկո Սանդրինի

Խաչաձև ակտիվների ռազմավարության գծով ստորաբաժանման ղեկավար

Ջոն Օթուլ

Խաչաձև ակտիվների ներդրումների գծով լուծումների ստորաբաժանման ղեկավար

Տնտեսական աճի հեռանկարները շարունակում են մնալ համեմատաբար բարենպաստ, թեև նկատվում են տարբերություններ ԱՄՆ-ի և Եվրոպայի միջև, ինչպես նաև զարգացած շուկաների մեծ մասում գնաճի՝ նպատակային մակարդակից բարձր մնալու ակնկալիքներ։ Գնաճի հետ կապված այս մտահոգություններն առավել ակնհայտ են ֆիքսված եկամտով գործիքների շուկայում։ Մյուս կողմից, ռիսկային ակտիվների աճին նպաստել են կորպորատիվ շահույթների ուժեղ ցուցանիշները, արհեստական բանականության ուղղությունը և Մերձավոր Արևելքի հակամարտության կարգավորման շուրջ լավատեսությունը։ Մենք շարունակում ենք պահպանել չափավոր դրական վերաբերմունք ռիսկային ակտիվների նկատմամբ՝ օգտվելով շուկայական շարժերի ստեղծած հնարավորություններից և միաժամանակ մեծացնելով հեջավորման միջոցների դերը։ 

Բաժնետոմսերի շուկայում, թեև շարունակում ենք չափավոր դրական դիրքորոշում պահպանել ԱՄՆ-ի և Լատինական Ամերիկայի զարգացող շուկաների բաժնետոմսերի նկատմամբ, ընդունում ենք, որ շուկաները վերջերս հասել են ռեկորդային մակարդակների։ Մենք կարծում ենք, որ այն ռիսկերը (աշխարհաքաղաքական զարգացումներ, ԱՄՆ–Իրան հարաբերություններ), որոնց շուկաները ներկայումս մեծ նշանակություն չեն տալիս, շարունակում են պահպանվել։ Հետևաբար, ներդրողները պետք է դիտարկեն ԱՄՆ բաժնետոմսերի գծով պաշտպանության մակարդակի բարձրացման հնարավորությունը և պահպանեն երաշխիքները Եվրոպայում։ 

Պարտատոմսերի շուկայում մենք շարունակում ենք դրական գնահատել ԱՄՆ ժամկետայնությունը, Գերմանիայի պետական պարտատոմսերը, ինչպես նաև իտալական BTP-ները՝ գերմանական Bund-երի համեմատ, և զարգացող շուկաների սպրեդները։ Միևնույն ժամանակ, ճապոնական պետական պարտատոմսերի նկատմամբ պահպանում ենք զգուշավոր դիրքորոշում։ Եվրոպական ներդրումային դասի պարտքային գործիքների հատվածում, որտեղ գործում ենք շատ ակտիվ, վերջերս մարտավարական տեսանկյունից նվազեցրել ենք մեր դիրքորոշումը՝ սպրեդների նեղացման պատճառով։ Այնուամենայնիվ, շարունակում ենք դրական գնահատել այս հատվածը՝ գրավիչ եկամտաբերության և ամուր հիմնարար գործոնների շնորհիվ։ Կշարունակենք հնարավորություններ որոնել մեր կարծիքները բարելավելու համար, երբ գնահատականները դառնան ավելի գրավիչ։

Արտարժութային շուկայում նախապատվությունը տալիս ենք հումքային ապրանքների հետ կապված և ավելի բարձր եկամտաբերություն առաջարկող արժույթներին, ինչպիսիք են ավստրալիական դոլարը և նորվեգական կրոնը։ Մարտավարական տեսանկյունից նաև որոշ չափով մեղմացրել ենք մեր դրական դիրքորոշումը ճապոնական իենի նկատմամբ՝ շվեյցարական ֆրանկի համեմատ։ Ճապոնիայում բացասական իրական տոկոսադրույքները կարճաժամկետ հեռանկարում կարող են ճնշում գործադրել իենի վրա։ Սակայն Ճապոնիայի բանկի վերջին միջամտությունները վկայում են, որ կենտրոնական բանկը մտադիր է սահմանափակել իենի թուլացումը։ Աջակցող գործոններ են նաև արժույթի գրավիչ գնահատականը (շվեյցարական ֆրանկի համեմատ) և դրամավարկային քաղաքականությունների տարբերությունը (Շվեյցարիայում տոկոսադրույքների իջեցում և Ճապոնիայի բանկի կողմից դրանց բարձրացում)։ Ի վերջո, երկարաժամկետ հեռանկարում ոսկին պետք է շահի աշխարհաքաղաքական ռիսկերի և կենտրոնական բանկերի գնումների ֆոնին։

ՀԵՌԱՆԿԱՐՆԵՐ

Ակտիվների դասերի վերաբերյալ Ամունդի դիրքորոշում

ԿԱՐԵՎՈՐ ՏԵՂԵԿՈՒԹՅՈՒՆ

ՄՍՄԿ-ի տեղեկությունները կարող են գործածվել միայն Ձեր ներքին օգտագործման համար, չեն կարող վերարտադրվել կամ տարածվել որևէ ձևով և չեն կարող գործածվել որպես որևէ ֆինանսական գործիքի կամ պրոդուկտի կամ ինդեքսի հիմք կամ դրա բաղադրիչ։ ՄՍՄԿ-ի որևէ տեղեկություն նախատեսված չէ լինելու ներդրումային խորհրդատվություն կամ որևէ տեսակի ներդրումային որոշում կայացնելու (կամ դրանից զերծ մնալու) առաջարկություն, և դրա վրա չի կարելի հիմնվել որպես այդպիսին։ Պատմական տվյալները և վերլուծությունը չպետք է ընկալվեն որպես որևէ հետագա կատարողականի վերլուծության, կանխատեսման կամ կանխագուշակման մասին նշում կամ երաշխիք։ ՄՍՄԿ-ի տեղեկությունները տրամադրվել են «այնպես, ինչպես կա» հիմքով, և սույն տեղեկություններն օգտագործողն ստանձնում է սույն տեղեկությունների ցանկացած օգտագործման բոլոր ռիսկերը։ ՄՍՄԿ-ն, դրա փոխկապակցված անձինք և յուրաքանչյուր անձ, որը ներգրավված է ՄՍՄԿ-ի որևէ տեղեկություն կազմելուն կամ կապված է դրա հետ (միասին «ՄՍՄԿ կողմեր»), սույն տեղեկությունների մասով բացահայտ հրաժարվում է բոլոր երաշխիքներից (այդ թվում, առանց սահմանափակման, բնօրինակության, ճշգրտության, ամբողջականության, ժամանակին լինելու, խախտում չկատարելու, վաճառքի համար պիտանիության և կոնկրետ նպատակին համապատասխանության վերաբերյալ ցանկացած երաշխիքից)։ Չսահմանափակելով վերոնշյալ որևէ դրույթ, ՄՍՄԿ որևէ կողմ որևէ դեպքում չի կրում որևէ պատասխանատվություն որևէ ուղղակի, անուղղակի, հատուկ, պատահական, պատժիչ, հետևանքային (այդ թվում, առանց սահմանափակման, բաց թողնված օգուտի) կամ որևէ այլ վնասի համար։ (www.mscibarra.com)։ 

SM արդյունաբերությունների դասակարգման համաշխարհային ստանդարտը (ԱԴՀՍ) մշակվել է «Ստենդրդ ընդ Փուրզ»-ի և ՄՍՄԿ-ի կողմից և դրանց բացառիկ սեփականությունն ու ծառայությունների ապրանքանիշն է։ Ոչ «Ստենդրդ ընդ Փուրզ»-ը, ՄՍՄԿ-ն և ոչ էլ ԱԴՀՍ որևէ դասակարգում մշակելուն կամ կազմելուն ներգրավված որևէ այլ կողմ որևէ բացահայտ կամ ենթադրյալ երաշխիք կամ հավաստիացում չի տալիս այդ ստանդարտի կամ դասակարգման (կամ դրանց օգտագործումից ստացվելիք արդյունքի) վերաբերյալ, և այդ բոլոր կողմերը սույնով բացահայտ հրաժարվում են ցանկացած այդպիսի ստանդարտի կամ դասակարգման առնչությամբ բնօրինակության, ճշգրտության, ամբողջականության, վաճառքի համար պիտանիության կամ կոնկրետ նպատակին համապատասխանության վերաբերյալ ցանկացած երաշխիքից։ Չսահմանափակելով վերոնշյալ որևէ դրույթ, «Ստենդրդ ընդ Փուրզ»-ը, ՄՍՄԿ-ն, դրան որևէ փոխկապակցված անձ կամ ԱԴՀՍ որևէ դասակարգում մշակելուն կամ կազմելուն ներգրավված որևէ երրորդ կողմ որևէ պատասխանատվություն չի կրում որևէ ուղղակի, անուղղակի, հատուկ, պատժիչ, հետևանքային կամ որևէ այլ վնասի (այդ թվում՝ բաց թողնված օգուտի) համար, նույնիսկ եթե ծանուցվել է այդ վնասների հնարավոր լինելու մասին։

Սույն փաստաթուղթը նախատեսված է միայն տեղեկատվական նպատակների համար: Սույն փաստաթուղթը չի  հանդիսանում վաճառքի առաջարկ, գնման առաջարկի հրավեր կամ որևէ արժեթղթի կամ որևէ այլ պրոդուկտի կամ ծառայության առաջարկություն։ Ցանկացած արժեթուղթ, պրոդուկտ կամ ծառայություն, որին հղում է կատարվում, կարող են գրանցված չլինել Ձեր պետությունում համապատասխան մարմնի կողմից վաճառքի համար և կարող են չկարգավորվել կամ չվերահսկվել Ձեր պետությունում որևէ պետական կամ համանման մարմնի կողմից։ Այս փաստաթղթում պարունակվող տեղեկատվությունը չպետք է փոփոխվի կամ ներկայացվի այնպես, որ առաջացնի թյուրընկալումներ կամ սխալ հավաստիացումներ։ Փաստաթղթի բովանդակության ցանկացած օգտագործում, վերարտադրում կամ տարածում առանց ամբողջական և պատշաճ հղման սկզբնաղբյուրին արգելվում է։ Սույն փաստաթղթում պարունակվող ցանկացած տեղեկություն չի կարող օգտագործվել որպես որևէ ֆինանսական գործիքի կամ պրոդուկտի կամ ինդեքսի հիմք կամ դրա բաղադրիչ։ Ավելին, ոչինչ սույն փաստաթղթում նախատեսված չէ հարկային, իրավական կամ ներդրումային խորհրդատվություն տրամադրելու համար։ Եթե այլ բան նշված չէ, ապա սույն փաստաթղթում պարունակվող բոլոր տեղեկություններն ստացվել են «Ամունդի Ասեթ Մենեջմենթ ԷսԱԷս» ընկերությունից և ներկայաված են 2026 թվականի մայիսի 29-ի դրությամբ։ Դիվերսիֆիկացիան չի երաշխավորում շահույթ կամ չի պաշտպանում կորուստից։ Սույն փաստաթուղթը տրամադրվել է «այնպես, ինչպես կա» հիմքով, և սույն տեղեկություններն օգտագործողն ստանձնում է սույն տեղեկությունների ցանկացած օգտագործման բոլոր ռիսկերը։ Պատմական տվյալները և վերլուծությունը չպետք է ընկալվեն որպես որևէ հետագա կատարողականի վերլուծության, կանխատեսման կամ կանխագուշակման մասին նշում կամ երաշխիք։ Շուկայի և շուկայի միտումների վերաբերյալ արտահայտված տեսակետները հեղինակի տեսակետներն են և պարտադիր չէ, որ լինեն «Ամունդի Ասեթ Մենեջմենթ ԷսԱԷս» ընկերության կամ Ամունդի-Ակբա Ասեթ Մենեջմենթ ՓԲԸ-ի տեսակետներ ու ցանկացած պահի ենթակա են փոփոխության՝ շուկայի և այլ պայմանների հիման վրա, և չեն կարող լինել հավաստիացումներ առ այն, որ երկրները, շուկաները կամ ոլորտները կհամապատասխանեն ակնկալիքներին։ Սույն տեսակետները պետք չէ հիմք ընդունել որպես ներդրումային խորհրդատվություն, արժեթղթի առաջարկություն կամ «Ամունդի» ընկերության կամ Ամունդի-Ակբայի որևէ պրոդուկտի առքուվաճառքի մասին նշում։ Ներդրումը ներառում է ռիսկեր, այդ թվում՝ շուկայական, քաղաքական, իրացվելիության և արժույթի հետ կապված ռիսկեր։ Ավելին, «Ամունդին» կամ Ամունդի-Ակբան որևէ դեպքում չեն կրում որևէ պատասխանատվություն դրա հետևանքով առաջացած որևէ ուղղակի, անուղղակի, հատուկ, պատահական, պատժիչ, հետևանքային (այդ թվում, առանց սահմանափակման, բաց թողնված օգուտի) կամ որևէ այլ վնասի համար։

Առաջին օգտագործման ամսաթիվը՝ 2026թ. մայիսի 29։ 

«Ամունդի-Ակբա Ասեթ Մենեջմենթ» ՓԲԸ-ն իրավաբանական անձ է, որը գրանցված է Հայաստանի Հանրապետությունում և Հայաստանի Կենտրոնական բանկի կողմից տրամադրած ներդրումային ֆոնդերի կառավարման թիվ 0002-ի լիցենզիայի հիման վրա, Հայաստանի Հանրապետությունում իրականացնում է պարտադիր կենսաթոշակային ֆոնդերի կառավարում։ Գրանցված գրասենյակը գտնվում է Երևան, Վազգեն Սարգսյան 10, 100-101 տարածք։  

Ամունդի-Ակբայի մասին ավելին իմանալու համար կարող եք այցելել www.amundi-acba.am կամ զանգահարել 011-310-000։