Տիեզերական երազանքներ՝ երկրային իրականության պայմաններում

Վերջին ամսվա ընթացքում կենտրոնական բանկերն ավելի կոշտ դիրքորոշում են որդեգրել, ինչի հետևանքով շուկաներն սկսել են վերագնահատել արհեստական բանականության ուղղությամբ ներդրումների բացառիկ աճի երևույթը։ Չնայած ԱՄՆ-Իրան հրադադարի վերաբերյալ դրական լուրերին՝ գնաճային ճնշումների պահպանման պայմաններում քաղաքականություն մշակողները շարունակում են զգուշավոր մոտեցում ցուցաբերել։ 

Արհեստական բանականության շուրջ ձևավորված լավատեսությունը ռիսկային ակտիվների աճի հիմնական շարժիչ ուժն է եղել, ընդ որում առաջատար են եղել աճի թափ ունեցող բաժնետոմսերը։ Սակայն, տոկոսադրույքների հնարավոր հետագա բարձրացման հետ կապված շարունակական անորոշության պայմաններում, շուկաներն սկսել են կասկածի տակ դնել, թե արդյոք ԱԲ ոլորտի բարձր գնահատումները կարող են պահպանվել, հատկապես առավել անորոշ տոկոսադրույքային միջավայրում և սկզբնական հանրային առաջարկների ընդլայնման պայմաններում։ Ներդրումների վերաբաշխումն արդեն իսկ սկսում է դրսևորվել, քանի որ ներդրողներն իրացնում են շահույթը և իրենց ներդրումները տեղափոխում շուկայի ավելի քիչ ծանրաբեռնված հատվածներ։

Առաջիկայում, հավանաբար, կպահպանվեն ԱԲ ոլորտի շահութաբերության, գնահատումների և շուկայի կենտրոնացվածության ռիսկերի վերաբերյալ մտահոգությունները։ Կապիտալ ծախսերի չափազանց մեծ ծավալները և սպասվածից թույլ ֆինանսական արդյունքները շարունակում են մնալ ԱՄՆ խոշոր տեխնոլոգիական ընկերությունների հիմնական ռիսկերը, հատկապես հաշվի առնելով, որ հիշողության չիպեր արտադրող ընկերությունների բաժնետոմսերի վերջին կտրուկ աճը կարող է արդեն իսկ չափազանցված լինելու նշաններ ցույց տալ։ Լավ ապահովված սկզբնական հանրային առաջարկները կարող են նպաստել շուկային, սակայն նոր մասնակիցների մուտքը և ԱԲ ոլորտի գնահատման ավելի բազմազան չափանիշների կիրառումը կուժեղացնեն ներկայիս առաջատարների նկատմամբ մանրակրկիտ վերահսկողությունը և կարող են նպաստել ներդրումների ավելի լայն դիվերսիֆիկացմանը։ Այս պայմաններում մենք շարունակում ենք ենթադրել, որ տնտեսական աճը կպահպանվի, սակայն այն, մեր գնահատմամբ, բավարար չի լինի մակրոտնտեսական ծախսերի աճն ու գնային ճնշումների ընդլայնումն ամբողջությամբ փոխհատուցելու համար։

• Ակնկալվում է, որ Հորմուզի ռազմավարական նշանակություն ունեցող նեղուցում բեռնափոխադրումների խափանումները տարվա երկրորդ կեսին կթուլանան, թեև համաձայնագիրը շարունակում է փխրուն մնալ, իսկ նավթի գներում աշխարհաքաղաքական ռիսկի հավելավճարը, ամենայն հավանականությամբ, մասամբ կպահպանվի։ Նավթի գները նվազել են իրենց առավելագույն մակարդակից, սակայն շարունակում են մնալ նախապատերազմյան մակարդակից բարձր։ Ակնկալվում է, որ ԱՄՆ տնտեսությունը կպահպանի իր դիմակայունությունը, մինչդեռ Եվրոպան շարունակում է ավելի խոցելի լինել՝ նավթի և բնական գազի ներմուծումից բարձր կախվածության և պաշարների ցածր մակարդակի պատճառով։ 

• Կենտրոնական բանկերն ուշադրության կենտրոնում են։ Եվրոպական կենտրոնական բանկն արձագանքում է հրապարակվող տնտեսական տվյալներին և իր քաղաքականությունը հարմարեցնում գնաճային ճնշումներին։ Մենք ակնկալում ենք, որ այս տարի տոկոսադրույքները ևս մեկ անգամ կբարձրացվեն, սակայն կանխատեսումների հստակությունը շարունակում է սահմանափակ լինել, քանի որ շատ բան կախված կլինի նրանից, թե գնաճն ինչ ծավալով և որքան ժամանակով կշեղվի նպատակային մակարդակից։ Ակնկալվում է, որ ԱՄՆ Դաշնային պահուստային համակարգն այս տարի տոկոսադրույքներն անփոփոխ կթողնի, թեև դրանց բարձրացման հավանականությունը կարող է աճել, եթե էներգակիրների ավելի բարձր գները փոխանցվեն ավելի լայն գնաճային ճնշումների, իսկ տնտեսական աճն արագանա։ 

• Մերձավոր Արևելքում լարվածության թուլացման փոփոխական սցենար։ Առաջիկա վեց ամիսներին կփորձարկվի մեր սցենարի հաստատունությունը, որը հիմնված է այն ենթադրության վրա, որ Մերձավոր Արևելքի ճգնաժամում կպահպանվի լարվածության թուլացման փոփոխական միտումը, իսկ Հորմուզի նեղուցը կվերաբացվի, թեև կայուն համաձայնության հասնելու հեռանկարները շարունակում են մնալ անորոշ։ Հակամարտության ցանկացած նոր սրացում կարող է բացասաբար անդրադառնալ տնտեսական աճի վրա, խստացնել ֆինանսական պայմանները և ճնշում գործադրել բաժնետոմսերի ու պարտատոմսերի շուկաների վրա՝ միաժամանակ նպաստելով ապահով ապաստարանի ակտիվներ հանդիսացող հումքային ապրանքների և ոսկու շրջանառության աճին։ 

• ԱՄՆ դոլարը շարունակում է կարճաժամկետ տեսանկյունից գրավիչ լինել, սակայն երկարաժամկետ հեռանկարում դրա թուլացման միտումը հավանաբար կպահպանվի։ Թեև մենք կարծում ենք, որ ԱՄՆ դոլարի երկարաժամկետ թուլացման նախադրյալները նույնն են մնալու, աշխարհի մյուս երկրների համեմատ ԱՄՆ տնտեսության դիմակայուն աճը, շարունակվող գնաճային ճնշումները և Դաշնային պահուստի կոշտ դրամավարկային դիրքորոշումը կարող են կարճաժամկետ հեռանկարում որոշակիորեն նպաստել դոլարին։ 

Ամփոփելով՝ նշենք, որ ներկայումս տնտեսական միջավայրի պակաս բարենպաստ պայմանները դեռևս փոխհատուցվում են շուկայում առկա բարձր իրացվելիությամբ և ընկերությունների շահույթի կայուն աճով։ Այդ պատճառով մենք շարունակում ենք պահպանել ռիսկի նկատմամբ զգուշավոր, սակայն դրական մոտեցումը՝ այն վերջերս որոշ չափով նվազեցնելով, կիրառելով ռիսկերի հեջավորման միջոցներ և առաջնահերթություն տալով ներդրումների դիվերսիֆիկացմանը՝ շուկայի կենտրոնացվածության ռիսկը նվազեցնելու նպատակով։ 

Ընդհանուր առմամբ, ներդրումային որոշումներ կայացնելիս անհրաժեշտ է ուշադրությունը չսևեռել միայն կարճաժամկետ իրադարձությունների վրա, այլ կենտրոնանալ կառուցվածքային դիմակայունության, գնագոյացման ազդեցության և արտաքին ցնցումները կլանելու ընկերությունների կարողության վրա։ Այս հատկանիշները կարելի է գտնել տարբեր տարածաշրջաններում և տնտեսության տարբեր ոլորտներում։ Ստորև ներկայացված են ակտիվների հիմնական դասերի վերաբերյալ մեր հիմնական համոզմունքները․ 

• Ֆիքսված եկամտով գործիքների դեպքում ԱՄՆ-ի պարտատոմսերի ժամկետայնության նկատմամբ դեռևս պահպանում ենք փոքր-ինչ զգուշավոր, գրեթե չեզոք դիրքորոշում՝ հաշվի առնելով աշխատաշուկայի դիմակայունությունը, գնաճային ճնշումների կայուն բնույթը և Դաշնային պահուստի ավելի կոշտ դիրքորոշումը։ Եվրոպայում, նույնիսկ եթե Եվրոպական կենտրոնական բանկն այս տարի բարձրացնի տոկոսադրույքները, չենք ակնկալում բարձրացումների ամբողջական ցիկլ, ինչը նպաստավոր է եկամտաբերության կորի կարճ հատվածի համար։ Այդ պատճառով նախապատվությունը տալիս ենք եվրագոտու ռիսկային պետական պարտատոմսերին՝ բարձր վարկանիշ ունեցող պետական պարտատոմսերի համեմատ։ Միացյալ Թագավորությունում նույնպես չենք սպասում տոկոսադրույքների բարձրացման ամբողջական ցիկլի և առայժմ դրական ենք գնահատում ժամկետայնությունը, հատկապես եկամտաբերության կորի կարճ հատվածում, թեև հարկաբյուջետային ռիսկերը դեռևս զգուշավորություն են պահանջում։ Այդուհանդերձ, բարձր վարկային որակ ունեցող պարտքային գործիքները շարունակում են առաջարկել գրավիչ եկամտաբերություն, իսկ զարգացող շուկաների պարտքային գործիքների նկատմամբ, հատկապես Լատինական Ամերիկայում, մեր դրական գնահատականը մնում է անփոփոխ։ 

• Բաժնետոմսերի դեպքում շարունակում ենք հավասարակշռված մոտեցում ցուցաբերել՝ նախապատվությունը տալով դիմակայուն բիզնեսներին և ամուր հաշվեկշիռ ունեցող ընկերություններին։ Մեր ուշադրության կենտրոնում շարունակում են մնալ գրավիչ պաշտպանական ոլորտները, մասնավորապես՝ սպառողական առաջին անհրաժեշտության ապրանքների և առողջապահության ոլորտները, ինչպես նաև արդյունաբերության և նյութերի ոլորտների որակյալ ընկերությունները։ 

• Բազմաակտիվների դեպքում շարունակում ենք պահպանել ռիսկի նկատմամբ փոքր-ինչ դրական մոտեցումը՝ միաժամանակ նվազեցնելով կենտրոնացվածության ռիսկը։ Այդ նպատակով կրճատել ենք ԱՄՆ բաժնետոմսերում մեր դիրքերը և ներդրումները դիվերսիֆիկացրել դեպի Եվրոպա, ինչպես նաև դեպի S&P 500-ի հավասար կշռված ինդեքս։ Ֆիքսված եկամտով գործիքների մասով շարունակում ենք դրական գնահատել եվրոպական ժամկետայնությունը և եվրոպական ներդրումային դասի պարտքային գործիքները։ Միաժամանակ փոքր-ինչ կրճատել ենք զարգացող շուկաների կարճաժամկետ տոկոսադրույքային գործիքներում մեր դիրքերը։     

ՖԻՔՍՎԱԾ ԵԿԱՄՈՒՏ 

Գնաճային և տնտեսական աճի ռիսկերի հավասարակշռումը 

Ամորի Դորսեյ

Ֆիքսված եկամտաբերությամբ ներդրումային գործիքների գծով ղեկավար

Մերձավոր Արևելքում լարվածության անկայուն թուլացման սցենարի պայմաններում գնաճը, ամենայն հավանականությամբ, ավելի երկար ժամանակ կմնա կենտրոնական բանկերի նպատակային մակարդակից բարձր՝ մեծացնելով գնաճի երկրորդային ազդեցությունների ռիսկը, հատկապես Եվրոպայում, որտեղ տնտեսական աճի հեռանկարները շարունակում են խոցելի լինել։ Մասնավորապես, կարծում ենք, որ շուկաները թերագնահատում են Եվրոպայում տնտեսական աճի ռիսկերը։ Հետևաբար, չենք ակնկալում, որ Եվրոպական կենտրոնական բանկը և Անգլիայի բանկը կանցնեն տոկոսադրույքների բարձրացման ամբողջական ցիկլի, ինչն էլ գրավիչ է դարձնում եկամտաբերության կորի կարճ հատվածը։  

ԱՄՆ-ում աշխատաշուկայի դիմակայունությունը, ընդհանուր գնաճի բարձր մակարդակը և Դաշնային պահուստի համեմատաբար կոշտ դիրքորոշումը բարձրացնում են տոկոսադրույքները՝ եկամտաբերության կորի միջին հատվածում դրանք հասցնելով մեր գնահատմամբ գրավիչ մակարդակի։

Ժամկետայնության (Duration) ու եկամտաբերության կորեր

• ԱՄՆ-ի դեպքում ժամկետայնության նկատմամբ պահպանում ենք չեզոք դիրքորոշում՝ առավել գրավիչ համարելով հնգամյա ժամկետայնությունը և շարունակելով ակնկալել եկամտաբերության կորի թեքության աճ։ Եվրագոտում դրական ենք գնահատում եկամտաբերության կորի կարճ հատվածը, քանի որ շուկաները դեռ ամբողջությամբ չեն արտացոլել տնտեսական աճի վատթարացող հեռանկարները։ Նախապատվությունը տալիս ենք եվրագոտու ռիսկային պետական պարտատոմսերին՝ բարձր վարկանիշ ունեցող պետական պարտատոմսերի համեմատ։  

• ՄԹ-ում չենք ակնկալում տոկոսադրույքների բարձրացման ամբողջական ցիկլ և շարունակում ենք դրական գնահատել ժամկետայնությունը, հատկապես եկամտաբերության կորի կարճ հատվածում, քանի որ գնահատումներն ավելի գրավիչ են։ Միաժամանակ շարունակում ենք ուշադրության կենտրոնում պահել հարկաբյուջետային ռիսկերը։  

• Ասիայում շարունակում ենք զգուշավոր մոտեցում ցուցաբերել Ճապոնիայի պետական պարտատոմսերի նկատմամբ։ 

Պարտքային գործիքներ 

• Ընդհանուր առմամբ շարունակում ենք դրական գնահատել պարտքային գործիքները, քանի որ հիմնարար ցուցանիշները մնում են ամուր, իսկ ավելի բարձր եկամտաբերության որոնումը շարունակում է նպաստել ակտիվների այս դասին։

• Շարունակում ենք նախապատվությունը տալ եվրոպական ներդրումային դասի պարտքային գործիքներին՝ դրանց ամուր հիմնարար ցուցանիշների և գրավիչ գնահատումների շնորհիվ։ ԱՄՆ ներդրումային դասի պարտքային գործիքների նկատմամբ նույնպես փոքր-ինչ դրական ենք տրամադրված՝ հաշվի առնելով դրանց դիմակայունությունը գնաճային ցնցումների նկատմամբ։ Ոլորտային առումով նախապատվությունը տալիս ենք ֆինանսական ընկերությունների պարտքային գործիքներին՝ ոչ ֆինանսականների համեմատ։ 

• Շարունակում ենք նախապատվությունը տալ ստորադաս պարտքային գործիքներին՝ բարձր եկամտաբերությամբ պարտքային գործիքների համեմատ։ 

Զարգացող շուկաների պարտատոմսեր ու արտարժույթ 

• Շարունակում ենք դրական գնահատել զարգացող շուկաների պարտքային գործիքները։ Ընդհանուր առմամբ իրացվելիության պայմանները մնում են բարենպաստ, թեև Դաշնային պահուստի քաղաքականությունը շարունակում է լինել այն առանցքային գործոնը, որին պետք է հետևել։ 

• Դրական ենք գնահատում զարգացող շուկաների կոշտ արժույթով արտահայտված պարտքային գործիքները՝ ընտրովի հնարավորություններ տեսնելով կորպորատիվ պարտքային գործիքների շուկայում՝ տեխնոլոգիական զարգացման և կանաչ անցման միտումներից օգտվելու համար։  

• Տեղական արժույթով թողարկված պարտատոմսերն առաջարկում են գրավիչ եկամտաբերություն, սակայն մենք նախապատվությունը տալիս ենք ընտրողական մոտեցմանը՝ կենտրոնանալով առանձին երկրների վրա, այլ ոչ թե զարգացող շուկաների լայն ընդգրկմանը՝ առավել մեծ ուշադրություն դարձնելով Լատինական Ամերիկայի հումքային ապրանքներ արտահանող երկրներին։ 

ԲԱԺՆԵՏՈՄՍԵՐ 

Եվրոպայի արդյունաբերական ներուժը 

Բարրի Գլավին

Բաժնետոմսերի հարթակի ղեկավար 

Ընկերությունների շահույթի աճը շարունակում է նպաստել շուկաների կայունությանը՝ մեղմելով ԱՄՆ-ում եկամտաբերության աճի հետ կապված մտահոգությունները։ Առաջիկայում ուշադրության կենտրոնում կմնան կենտրոնական բանկերի դրամավարկային քաղաքականության որոշումներն ու ընդհանուր քաղաքականության ուղղվածությունը։ Ռազմավարական տեսանկյունից շարունակում ենք արձանագրել ԱՄՆ շուկայում բարձր գնահատումների և կենտրոնացվածության ռիսկեր, ուստի նախապատվությունը տալիս ենք Եվրոպային, Ճապոնիային և զարգացող շուկաներին։ Հատկապես Եվրոպայում տնտեսությունն աստիճանաբար անցում է կատարում սպառման վրա հիմնված մոդելից դեպի դիմակայունության վրա հիմնված մոդել՝ ամրապնդելով տարածաշրջանի դիրքը որպես երկարաժամկետ ներդրումային ուղղություն։

Ճապոնիայում բաժնետոմսերի շուկայի հեռանկարները շարունակում են մնալ դրական, իսկ շահույթի աճի հիմնական շարժիչ ուժը բանկային և արհեստական բանականության հետ առնչվող ընկերություններն են։ Զարգացող շուկաները նույնպես շարունակում են գրավիչ լինել՝ որպես ներդրումների դիվերսիֆիկացման հնարավորություն՝ աշխարհաքաղաքական և տնտեսական անորոշության պայմաններում։

Զարգացած շուկաներ 

• Պահպանելով հավասարակշռված մոտեցումը՝ նախապատվությունը տալիս ենք դիմակայուն բիզնեսներին և ամուր հաշվեկշիռ ունեցող ընկերություններին, հատկապես սպառողական առաջին անհրաժեշտության ապրանքների, արդյունաբերության և նյութերի ոլորտներում։

• Եվրոպայում ավելացրել ենք ներդրումները սննդային բաղադրիչներ արտադրող ընկերություններում, որոնք առանձնանում են ՀՆԱ-ի աճը գերազանցող աճի տեմպերով, ոչ ցիկլային պահանջարկով և գրավիչ գնահատումներով։ Միաժամանակ, տեխնոլոգիական հատվածի ուժեղ աճից հետո կրճատել ենք եվրոպական տեխնոլոգիական ընկերություններում մեր դիրքերը։ Նախապատվությունը տալիս ենք էներգետիկ անցումից, արհեստական բանականության և տվյալների մշակման կենտրոնների կողմից էլեկտրաէներգիայի պահանջարկի աճից, ինչպես նաև ենթակառուցվածքային ներդրումներից շահող ընկերություններին, հատկապես արդյունաբերության, կապիտալ ապրանքների, կոմունալ ծառայությունների և շինարարության ոլորտներում։

• Ճապոնիայում բաժնետոմսերի շուկայի հեռանկարները շարունակում են մնալ դրական։ Նախապատվությունը տալիս ենք փոքր և միջին կապիտալացմամբ ընկերություններին, որոնք շահում են մատակարարման շղթաների դիմակայունության ամրապնդումից, ինչպես նաև արհեստական բանականության և ենթակառուցվածքների զարգացման միտումներից։

Զարգացող շուկաներ 

• Զարգացող շուկաների բաժնետոմսերի գնահատումները պահպանում են գրավչությունը։ Տեխնոլոգիական ոլորտում հաջողված սկզբնական հանրային առաջարկները կարող են խթանել չիպերի և հիշողության սարքերի պահանջարկը՝ նպաստելով զարգացող շուկաների տեխնոլոգիական ընկերությունների բաժնետոմսերի աճին։ Միևնույն ժամանակ, շուկաների բարձր կենտրոնացվածության պատճառով տատանողականությունը կարող է պահպանվել։ 

• Հնդկաստանի նկատմամբ պահպանում ենք չեզոք դիրքորոշում, քանի որ գնահատումները դեռևս բարձր են, երկիրը մնում է հումքային ապրանքների ներմուծող, իսկ արհեստական բանականության թեմայի նկատմամբ դրա ներգրավվածությունը սահմանափակ է։ Նավթի գների ճնշման թուլացման պայմաններում կարող ենք փոքր-ինչ բարելավել մեր գնահատականը։ 

• Չինաստանի նկատմամբ նույնպես պահպանում ենք չեզոք դիրքորոշում, քանի որ բազմաթիվ ոլորտներում առկա գերարտադրության և անշարժ գույքի շուկայի վերաբերյալ ոչ հստակ տվյալների պատճառով շահույթի հեռանկարները շարունակում են մնալ անորոշ։ 

• Շարունակում ենք դրական գնահատել Լատինական Ամերիկան։ Բրազիլիայում ընկերությունների շահույթն ու շահութաբերությունը կրկին բարձր են, թեև հոկտեմբերին կայանալիք ընտրությունները կմնան ուշադրության կենտրոնում։

ԲԱԶՄԱԱԿՏԻՎՆԵՐ (MULTI-ASSET)

Ռիսկի նկատմամբ չափավոր դրական մոտեցում՝ շեշտը դնելով ընտրողականության վրա

Ֆրանչեսկո Սանդրինի 

Բազմակտիվների ռազմավարության գծով ստորաբաժանման ղեկավար  

Ջոն Օթուլ 

Բազմակտիվների ներդրումների գծով լուծումների ստորաբաժանման ղեկավար    

Մայիսին ռիսկային ակտիվների համար իրավիճակը բարենպաստ էր, սակայն մակրոտնտեսական միջավայրը փոքր-ինչ թուլացավ։ Տնտեսական աճը դառնում է ավելի անհամաչափ, մինչդեռ ԱՄՆ-ում, եվրագոտում և Միացյալ Թագավորությունում գնաճային ճնշումներն ավելի ակնհայտ են դառնում, ինչի հետևանքով կենտրոնական բանկերը ստիպված են ավելի զգուշավոր քաղաքականություն վարել։ Այս պայմաններում շարունակում ենք պահպանել ռիսկի նկատմամբ չափավոր դրական մոտեցումը՝ առավել մեծ ուշադրություն դարձնելով ընտրողականությանը։

Շարունակում ենք փոքր-ինչ դրական գնահատել բաժնետոմսերը՝ հիմնվելով ընկերությունների շահույթի ամուր ցուցանիշների վրա, սակայն միաժամանակ նվազեցրել ենք կենտրոնացվածության ռիսկը՝ կրճատելով ԱՄՆ բաժնետոմսերում մեր դիրքերը և ներդրումները դիվերսիֆիկացնելով դեպի Եվրոպա, ինչպես նաև դեպի S&P 500-ի հավասար կշռված ինդեքս։ Եվրոպական բաժնետոմսերը շարունակում են թերագնահատված լինել ներդրողների կողմից և հետ են մնում ԱՄՆ շուկայից, սակայն տարվա երկրորդ կեսին տեսնում ենք դրանց վերականգնման ներուժ։ Շարունակվող անորոշության պայմաններում մենք պահպանում ենք նաև ԱՄՆ-ի և եվրագոտու շուկաների նկատմամբ կիրառվող պաշտպանական միջոցները։  

Ֆիքսված եկամտով գործիքների մասով շարունակում ենք նախապատվությունը տալ ԱՄՆ հնգամյա ժամկետայնությանը, քանի որ եկամտաբերության կորի այս հատվածը շարունակում է մեզ համար գրավիչ մնալ։ Եվրոպայում շարունակում ենք նախապատվությունը տալ ավելի երկար ժամկետայնությանը՝ ներդրումներ կատարելով Գերմանիայի պետական պարտատոմսերում (Bunds) և Schatz պարտատոմսերում։ Թեև ակնկալում ենք, որ Եվրոպական կենտրոնական բանկն այս տարի ևս մեկ անգամ կբարձրացնի տոկոսադրույքները, կարծում ենք, որ այն չի կարող ամբողջությամբ անտեսել սպառման և տնտեսական աճի թուլացումը։ Եվրագոտու ռիսկային պետական պարտատոմսերի շարքում շարունակում ենք նախապատվությունը տալ Իտալիայի պետական պարտատոմսերին (BTP-ներ), քանի որ Իտալիան շարունակում է համեմատաբար կայուն դիրք զբաղեցնել։ Միաժամանակ շարունակում ենք պահպանել կարճ դիրք Ճապոնիայի 10-ամյա պետական պարտատոմսերում (JGB-ներ)՝ հաշվի առնելով դրամավարկային քաղաքականության կարգավորումը, էներգակիրների բարձր գները, իենի թուլացումը և գնաճային ռիսկերի աճը։ Վերջապես, շարունակում ենք դրական գնահատել եվրոպական ներդրումային դասի պարտքային գործիքները՝ գրավիչ գնահատումների, եկամտաբերություն փնտրող ներդրողների կայուն պահանջարկի և բարենպաստ սեզոնայնության շնորհիվ։ Զարգացող շուկաների մասով փոքր-ինչ նվազեցրել ենք կարճաժամկետ տոկոսադրույքային գործիքներում մեր դիրքերը՝ վերջին ժամանակահատվածում դրանց եկամտաբերության նվազումից հետո։ 

Արտարժույթի շուկայում երկարաժամկետ հեռանկարում շարունակում ենք ակնկալել ԱՄՆ դոլարի կառուցվածքային թուլացում, թեև կարճաժամկետում դրան կարող է նպաստել Դաշնային պահուստի ավելի կոշտ դիրքորոշումը։ Մենք դրական ենք գնահատում AUD/USD արժութային զույգը՝ արտահայտելով ԱՄՆ դոլարի նկատմամբ մեր բացասական սպասումները, և շարունակում ենք նախապատվությունը տալ հումքային ապրանքների շուկաների հետ սերտորեն կապված ներդրումային պատմությանը։ Բացի դրանից, եվրոյի նկատմամբ դրական ենք գնահատում ճապոնական իենը (JPY) և նորվեգական կրոնը (NOK)։ Եթե տնտեսական աճի պայմանները վատթարանան, դրանից կշահի իենը, իսկ նորվեգական կրոնը՝ Նորվեգիայի էներգետիկ ոլորտի նկատմամբ բարձր զգայունության շնորհիվ։ 

ՀԵՌԱՆԿԱՐՆԵՐ

Ակտիվների դասերի վերաբերյալ Ամունդի դիրքորոշում

ԿԱՐԵՎՈՐ ՏԵՂԵԿՈՒԹՅՈՒՆ

ՄՍՄԿ-ի տեղեկությունները կարող են գործածվել միայն Ձեր ներքին օգտագործման համար, չեն կարող վերարտադրվել կամ տարածվել որևէ ձևով և չեն կարող գործածվել որպես որևէ ֆինանսական գործիքի կամ պրոդուկտի կամ ինդեքսի հիմք կամ դրա բաղադրիչ։ ՄՍՄԿ-ի որևէ տեղեկություն նախատեսված չէ լինելու ներդրումային խորհրդատվություն կամ որևէ տեսակի ներդրումային որոշում կայացնելու (կամ դրանից զերծ մնալու) առաջարկություն, և դրա վրա չի կարելի հիմնվել որպես այդպիսին։ Պատմական տվյալները և վերլուծությունը չպետք է ընկալվեն որպես որևէ հետագա կատարողականի վերլուծության, կանխատեսման կամ կանխագուշակման մասին նշում կամ երաշխիք։ ՄՍՄԿ-ի տեղեկությունները տրամադրվել են «այնպես, ինչպես կա» հիմքով, և սույն տեղեկություններն օգտագործողն ստանձնում է սույն տեղեկությունների ցանկացած օգտագործման բոլոր ռիսկերը։ ՄՍՄԿ-ն, դրա փոխկապակցված անձինք և յուրաքանչյուր անձ, որը ներգրավված է ՄՍՄԿ-ի որևէ տեղեկություն կազմելուն կամ կապված է դրա հետ (միասին «ՄՍՄԿ կողմեր»), սույն տեղեկությունների մասով բացահայտ հրաժարվում է բոլոր երաշխիքներից (այդ թվում, առանց սահմանափակման, բնօրինակության, ճշգրտության, ամբողջականության, ժամանակին լինելու, խախտում չկատարելու, վաճառքի համար պիտանիության և կոնկրետ նպատակին համապատասխանության վերաբերյալ ցանկացած երաշխիքից)։ Չսահմանափակելով վերոնշյալ որևէ դրույթ, ՄՍՄԿ որևէ կողմ որևէ դեպքում չի կրում որևէ պատասխանատվություն որևէ ուղղակի, անուղղակի, հատուկ, պատահական, պատժիչ, հետևանքային (այդ թվում, առանց սահմանափակման, բաց թողնված օգուտի) կամ որևէ այլ վնասի համար։ (www.mscibarra.com)։ 

SM արդյունաբերությունների դասակարգման համաշխարհային ստանդարտը (ԱԴՀՍ) մշակվել է «Ստենդրդ ընդ Փուրզ»-ի և ՄՍՄԿ-ի կողմից և դրանց բացառիկ սեփականությունն ու ծառայությունների ապրանքանիշն է։ Ոչ «Ստենդրդ ընդ Փուրզ»-ը, ՄՍՄԿ-ն և ոչ էլ ԱԴՀՍ որևէ դասակարգում մշակելուն կամ կազմելուն ներգրավված որևէ այլ կողմ որևէ բացահայտ կամ ենթադրյալ երաշխիք կամ հավաստիացում չի տալիս այդ ստանդարտի կամ դասակարգման (կամ դրանց օգտագործումից ստացվելիք արդյունքի) վերաբերյալ, և այդ բոլոր կողմերը սույնով բացահայտ հրաժարվում են ցանկացած այդպիսի ստանդարտի կամ դասակարգման առնչությամբ բնօրինակության, ճշգրտության, ամբողջականության, վաճառքի համար պիտանիության կամ կոնկրետ նպատակին համապատասխանության վերաբերյալ ցանկացած երաշխիքից։ Չսահմանափակելով վերոնշյալ որևէ դրույթ, «Ստենդրդ ընդ Փուրզ»-ը, ՄՍՄԿ-ն, դրան որևէ փոխկապակցված անձ կամ ԱԴՀՍ որևէ դասակարգում մշակելուն կամ կազմելուն ներգրավված որևէ երրորդ կողմ որևէ պատասխանատվություն չի կրում որևէ ուղղակի, անուղղակի, հատուկ, պատժիչ, հետևանքային կամ որևէ այլ վնասի (այդ թվում՝ բաց թողնված օգուտի) համար, նույնիսկ եթե ծանուցվել է այդ վնասների հնարավոր լինելու մասին։

Սույն փաստաթուղթը նախատեսված է միայն տեղեկատվական նպատակների համար: Սույն փաստաթուղթը չի  հանդիսանում վաճառքի առաջարկ, գնման առաջարկի հրավեր կամ որևէ արժեթղթի կամ որևէ այլ պրոդուկտի կամ ծառայության առաջարկություն։ Ցանկացած արժեթուղթ, պրոդուկտ կամ ծառայություն, որին հղում է կատարվում, կարող են գրանցված չլինել Ձեր պետությունում համապատասխան մարմնի կողմից վաճառքի համար և կարող են չկարգավորվել կամ չվերահսկվել Ձեր պետությունում որևէ պետական կամ համանման մարմնի կողմից։ Այս փաստաթղթում պարունակվող տեղեկատվությունը չպետք է փոփոխվի կամ ներկայացվի այնպես, որ առաջացնի թյուրընկալումներ կամ սխալ հավաստիացումներ։ Փաստաթղթի բովանդակության ցանկացած օգտագործում, վերարտադրում կամ տարածում առանց ամբողջական և պատշաճ հղման սկզբնաղբյուրին արգելվում է։ Սույն փաստաթղթում պարունակվող ցանկացած տեղեկություն չի կարող օգտագործվել որպես որևէ ֆինանսական գործիքի կամ պրոդուկտի կամ ինդեքսի հիմք կամ դրա բաղադրիչ։ Ավելին, ոչինչ սույն փաստաթղթում նախատեսված չէ հարկային, իրավական կամ ներդրումային խորհրդատվություն տրամադրելու համար։ Եթե այլ բան նշված չէ, ապա սույն փաստաթղթում պարունակվող բոլոր տեղեկություններն ստացվել են «Ամունդի Ասեթ Մենեջմենթ ԷսԱԷս» ընկերությունից և ներկայաված են 2026 թվականի հունիսի 30-ի դրությամբ։ Դիվերսիֆիկացիան չի երաշխավորում շահույթ կամ չի պաշտպանում կորուստից։ Սույն փաստաթուղթը տրամադրվել է «այնպես, ինչպես կա» հիմքով, և սույն տեղեկություններն օգտագործողն ստանձնում է սույն տեղեկությունների ցանկացած օգտագործման բոլոր ռիսկերը։ Պատմական տվյալները և վերլուծությունը չպետք է ընկալվեն որպես որևէ հետագա կատարողականի վերլուծության, կանխատեսման կամ կանխագուշակման մասին նշում կամ երաշխիք։ Շուկայի և շուկայի միտումների վերաբերյալ արտահայտված տեսակետները հեղինակի տեսակետներն են և պարտադիր չէ, որ լինեն «Ամունդի Ասեթ Մենեջմենթ ԷսԱԷս» ընկերության կամ Ամունդի-Ակբա Ասեթ Մենեջմենթ ՓԲԸ-ի տեսակետներ ու ցանկացած պահի ենթակա են փոփոխության՝ շուկայի և այլ պայմանների հիման վրա, և չեն կարող լինել հավաստիացումներ առ այն, որ երկրները, շուկաները կամ ոլորտները կհամապատասխանեն ակնկալիքներին։ Սույն տեսակետները պետք չէ հիմք ընդունել որպես ներդրումային խորհրդատվություն, արժեթղթի առաջարկություն կամ «Ամունդի» ընկերության կամ Ամունդի-Ակբայի որևէ պրոդուկտի առքուվաճառքի մասին նշում։ Ներդրումը ներառում է ռիսկեր, այդ թվում՝ շուկայական, քաղաքական, իրացվելիության և արժույթի հետ կապված ռիսկեր։ Ավելին, «Ամունդին» կամ Ամունդի-Ակբան որևէ դեպքում չեն կրում որևէ պատասխանատվություն դրա հետևանքով առաջացած որևէ ուղղակի, անուղղակի, հատուկ, պատահական, պատժիչ, հետևանքային (այդ թվում, առանց սահմանափակման, բաց թողնված օգուտի) կամ որևէ այլ վնասի համար։

Առաջին օգտագործման ամսաթիվը՝ 2026թ. հունիսի 30։ 

«Ամունդի-Ակբա Ասեթ Մենեջմենթ» ՓԲԸ-ն իրավաբանական անձ է, որը գրանցված է Հայաստանի Հանրապետությունում և Հայաստանի Կենտրոնական բանկի կողմից տրամադրած ներդրումային ֆոնդերի կառավարման թիվ 0002-ի լիցենզիայի հիման վրա, Հայաստանի Հանրապետությունում իրականացնում է պարտադիր կենսաթոշակային ֆոնդերի կառավարում։ Գրանցված գրասենյակը գտնվում է Երևան, Վազգեն Սարգսյան 10, 100-101 տարածք։  

Ամունդի-Ակբայի մասին ավելին իմանալու համար կարող եք այցելել www.amundi-acba.am կամ զանգահարել 011-310-000։