Անդորր՝ շուկայական եռուզեռից հետո

Տարին մոտենում է ավարտին, ռիսկային ակտիվների մեծ մասը դրական դաշտում է, իսկ բաժնետոմսերի ու մետաղների համաշխարհային գները բազմիցս գտնվել են բարձրագույն կետերում։ ԱՄՆ կառավարության պատմական ամենաերկարատև փակումը նույնիսկ չկարողացավ զսպել շուկայի ոգևորգությունը։ Մեր կարծիքով, շուկաների թուլությունն անտեսվում է՝ հույսը դնելով այն բանի վրա, որ անհրաժեշտության դեպքում միշտ կգործեն դրամավարկային և ֆիսկալ լծակները, արհեստական բանականության ոլորտում ներդրումները գրեթե երաշխավորված եկամտաբերություն կապահովեն, իսկ կորպորատիվ շահույթները կշարունակեն գերազանցել սպասումները՝ ԱՄՆ-ում հատկապես տպավորիչ արդյունքների սեզոնից հետո (Եվրոպայում՝ այն ավելի համեստ էր)։ Սակագների ազդեցությունը սպառման վրա նույնպես մեծապես անտեսվում է։ 

Այդուհանդերձ, վերջին շրջանում ԱՄՆ-ում արհեստական բանականության շուրջ խանդավառության նկատմամբ մտահոգությունները հաստատում են մեր դիրքորոշումը։ Մենք պահպանում ենք այն կարծիքը, որ ԱԲ ոլորտում կապիտալ ծախսերը նպաստում են ԱՄՆ տնտեսության զարգացմանը, սակայն չեն հանգեցնում աշխատատեղերի ստեղծման։ Ավելին՝ թեև դրամավարկային և ֆիսկալ աջակցությունը կարող է կայունացնել տնտեսությունը, պահպանվում են ֆիսկալ գերիշխանության և ֆինանսական ճնշումների տեսքով ռիսկերը։ Մասնավորապես՝

• ԱՄՆ աճի պատկերը բարդ է։ ԱԲ ոլորտում ներդրումները դրական են ազդում, սակայն սպառումն ու աշխատաշուկան թուլանում են։ Բարձր եկամուտ ունեցողներն են ձևավորել այս տարվա ծախսումները, այդուհանդերձ՝ ցածր և միջին եկամուտ ունեցող սպառողների դժվարությունները կազդեն ընդհանուր սպառման վրա։ Օրինակ՝ տարվա վերջին ավարտվող առողջապահական սուբսիդիաները կբարձրացնեն այդ տնտեսությունների ծախսերը։ ԱՄՆ աշխատաշուկայի թուլացումը կշարունակվի, աշխատավարձերի աճը կմեղմվի։ Վերջապես՝ պահպանվում է Դաշնային պահուստի անկախության նկատմամբ ռիսկը։ Եթե Դաշնայինը տրվի ճնշմանը, ապա կարող է ավելի խորքային տոկոսադրույքների իջեցումներ իրականացնել, քան պահանջում է տնտեսական իրավիճակը։ Սա կարող է խաթարել գնաճային սպասումները։

«Բարձր գնահատումների և արհեստական բանականության ոլորտում ներդրումների խիստ քննադատության պայմաններում մենք հատկապես հետաքրքրված ենք արտադրողականության և եկամտաբերության  բարելավմամբ»։

• Եվրագոտու (ԵԳ) 2025 թվականի աճի կանխատեսումը բարձրացվել է 1,1 տոկոսից մինչև 1,3 տոկոս (Եվրահանձնաժողովի աշնանային կանխատեսումներին համահունչ), սակայն ներքին թույլ պահանջարկի պատճառով չենք կարող փոխել որակական գնահատականը։ Այս վերանայումը հիմնականում պայմանավորված է երրորդ եռամսյակի սպասումների համեմատ ավելի ուժեղ ցուցանիշներով (Ֆրանսիա և Իսպանիա), բայց մենք չենք փոխում ԵԳ տնտեսության մեր ընդհանուր գնահատականը։ Տեսնում ենք, որ պահանջարկը բարելավվում է շատ դանդաղ տեմպերով, ինչը համապատասխանում է բարձր խնայողության մակարդակին։ Երկրորդ՝ Գերմանիայից դուրս Եվրոպայում ֆիսկալ դիրքորոշումը չեզոք է։ Երրորդ՝ ԱՄՆ արտահանումների արտաքին միջավայրը մնում է երկիմաստ։ Նույնիսկ եթե ԱՄՆ Գերագույն դատարանն արգելի Թրամփին արտակարգ լիազորություններով սակագներ սահմանել, նա ունի ոլորտային սակագների կիրառման հնարավորություն։  

• ԵԳ և ԱՄՆ գնաճի կանխատեսումները փոփոխություն չեն կրել։ ԱՄՆ-ում գնաճը կարճաժամկետ հատվածում կմնա Դաշնային պահուստի թիրախից բարձր։ ԵԳ-ում գնաճի տեմպերի դանդաղումը շարունակվում է, 2026թ․ ընդհանուր ՍԳԻ կանխատեսումները մոտ 1,7 տոկոս են, որոնք 2027թ․ շատ թեթևակի բարձրանում են։ Կարևոր է, որ ԵԿԲ-ն 2027թ․ գնաճը գնահատում է 1,9 տոկոս, սակայն դա կախված է ETS2 (Արտանետումների առևտրի երկրորդ համակարգ) ներդրումից։ ETS2-ի 2027թ․հետո հետաձգումը հավանական է ստիպի բանկին իջեցնել այդ տարվա գնաճի կանխատեսումը։ ԱՄՆ գնաճի համար հաստատում ենք՝ կախված կլինի թե՛ ծառայությունների հիմնական գնաճի դանդաղման տեմպից, թե՛ հիմնական ապրանքների գներին սակագների փոխանցման արագությունից ու խորությունից։  

Աշխարհում, որտեղ ԱՄՆ աճը դանդաղում է, սակայն ոչ կտրուկ, բաժնետոմսերի գները բարձր են, սակայն հնարավորությունները պահպանվում են՝ կենտրոնացված սեգմենտներից դեպի ավելի բարձր եկամտաբերությամբ ակտիվների դասեր դիվերսիֆիկացիան տեղափոխելը հիմնական ուղղությունն է։ Սրան զուգահեռ՝ ԱՄՆ-ի բացառիկությանը մարտահրավերները, մեր կարծիքով, երկարաժամկետ կտրվածքով կարտացոլվեն դոլարի թուլացմամբ։

Թեև այս տարի եվրագոտու աճի կանխատեսումը բարձրացրել ենք, ներքին պահանջարկը մնալու է թույլ, և գնաճի տեմպերի նվազման հետ համատեղ դա կարող է ԵԿԲ-ին դրդել հաջորդ տարի իջեցնել քաղաքականության տոկոսադրույքները երկու անգամ»։ 

Մոնիկա Դեֆենդ

Ամունդի ներդրումային ինստիտուտի տնօրեն

Մեր հիմնական համոզմունքներն ակտիվների դասերի վերաբերյալ

• Ֆիքսված եկամտաբերությամբ ակտիվների հարցում ընդհանուր առմամբ չեզոք դիրքորոշում ենք պահպանում ժամկետայնության նկատմամբ և եկամտաբերության կորերի մեջ նկատում ենք տարածաշրջանային մակարդակով տարբերությունների հնարավորություն։ Օրինակ՝ եվրոպական ժամկետայնությունը հասցրել ենք դրական գնահատականի, նվազեցրել ՄԹ նկատմամբ դրական մոտեցումը, իսկ ԱՄՆ-ի դեպքում մոտենում ենք չեզոք/թեթև զգուշավոր դիրքորոշմանը։ Միևնույն ժամանակ՝ շարունակում ենք դրական մնալ եվրոպական ներդրումային դասի վարկերի և զարգացող շուկաների ֆիքսված եկամտաբերությամբ ակտիվների նկատմամբ, որտեղ եկամտաբերության և ընտրողականության գրավչությունը բարձր է։  

• Բաժնետոմսերի հարցում պահպանում ենք «ծանրաձողի» մոտեցումը՝ որակյալ ցիկլիկ ոլորտների և ավանդական բաժնետոմսերի ներառմամբ։ Հիմնական ուշադրությունը կենտրոնացած է կայուն ցուցանիշներով և գրավիչ արժեքով բիզնեսների վրա։ Այդպիսի ընկերությունների համադրություն գտնում ենք Եվրոպայում, Ճապոնիայում և զարգացող շուկաներում։ Զարգացող շուկաների բաժնետոմսերի գրավչությունը պայմանավորված է տարածաշրջանի ներքին ուժեղ տնտեսական աճով և դիվերսիֆիկացիոն ներուժով։ 

• Խաչաձև ակտիվների դեպքում ձգտում ենք պահպանել ավելի հավասարակշռված դիրքորոշում ռիսկային ակտիվներում։ Ընդհանուր առմամբ՝ դրական ենք մնում բաժնետոմսերի նկատմամբ, սակայն որոշակի ճշգրտումներ ենք կատարել՝ նվազեցնելով մոտեցումն ԱՄՆ-ի նկատմամբ և բարձրացնելով եվրոպական բաժնետոմսերինը, որտեղ գնահատումներն ավելի գրավիչ են։ Բացի դրանից՝ իջեցրել ենք զարգացող շուկաների պարտատոմսերի գնահատականը՝ սփրեդների նեղացումից հետո։ Համոզված ենք, որ այս հատվածում ներկայումս բացասական կատալիզատորները շատ սահմանափակ են, և առաջիկայում կարող են ի հայտ գալ նոր հնարավորություններ։

«Կարծում ենք, որ ներդրողները պետք է պահպանեն լավ դիվերսիֆիկացված պորտֆել՝ չափավոր ռիսկային կողմնորոշմամբ, որն ընդգրկում է արժեքային հնարավորություններ Եվրոպայի տարբեր տարածաշրջաններում, Ճապոնիայում և զարգացող շուկաներում»։

ՖԻՔՍՎԱԾ  ԵԿԱՄՈՒՏ

Ճկուն ժամկետայնություն գնաճի և քաղաքականության փոփոխվող պայմաններում

Ամորի Դորսեյ

Ֆիքսված եկամտի գծով ղեկավար

Եվրոպայում տնտեսական աճը զսպվում է զգուշավոր սպառողի կողմից, թեև մենք ակնկալում ենք գնաճի տեմպերի նվազման շարունակություն։ Եվրագոտու ընդհանուր գնաճը տարվա վերջին, ամենայն հավանականությամբ, կիջնի ԵԿԲ-ի թիրախից ցածր։ Այս երկու գործոններն էլ պետք է դրդեն ԵԿԲ-ին իջեցնել հաշվարկային տոկոսադրույքները։ 

ԱՄՆ-ում հաջորդ տարի միջանկյալ ընտրությունների ֆոնին ֆիսկալ խթանը կարող է որոշակի ճնշում գործադրել տեղական շուկաների վրա։ Ֆիսկալ կողմն ուշադրության կենտրոնում է նաև ՄԹ-ում, որտեղ կառավարությունը փորձում է կրճատել եկամուտների և ծախսերի միջև առկա բացը։ Ցանկացած ֆիսկալ խստացում կազդի աճի սպասումների վրա։ Մեր կորի թեքացման մասին պնդումը պահպանում ենք զարգացած աշխարհի մեծ մասում՝ բացառությամբ Ճապոնիայի։ Ընդհանուր առմամբ՝ փնտրում ենք հնարավորություններ եկամտաբերության կորերի ողջ երկայնքով՝ ինչպես զարգացած, այնպես էլ զարգացող շուկաներում՝ ավելի բարձր եկամտաբերության որոնման նպատակով։

Ժամկետայնության ու եկամտաբերության կորեր

• Թեպետ ընդհանուր առմամբ ժամկետայնության նկատմամբ մեր դիրքորոշումը չեզոք է, տարածաշրջանային մակարդակով նկատում ենք թեթև շեղումների հնարավորություն։ Օրինակ՝ եվրոպական ժամկետայնության նկատմամբ այժմ թեթևակի դրական ենք։ Այստեղ առանձնացնում ենք իտալական պետական պարտատոմսերը։ 
• ԱՄՆ-ում ժամկետայնության նկատմամբ դիրքորոշումը մի փոքր նվազեցրել ենք, բայց դրական ենք մնում գնաճին կապված պարտատոմսերի նկատմամբ։ ՄԹ պարտատոմսերի նկատմամբ հասել ենք սահմանային նվազագույն դրական շեմի և ուշադիր հետևում ենք ֆիսկալ քաղաքականությանը։  
• Ճապոնիայում զգուշավոր դիրքորոշումը հաստատվում է կառավարության վերջին ֆիսկալ ընդլայնմամբ։

Կորպորատիվ վարկ

• Համաշխարհային մակարդակով՝ դրական ենք եվրոպական վարկերի նկատմամբ, չեզոք՝ ԱՄՆ-ի և ՄԹ-ի նկատմամբ։ ԵՄ ՆԴ վարկերում կորպորատիվ ցուցանիշները մնում են կայուն, հատկապես ֆինանսական ոլորտում, ինչը հաստատում է երրորդ եռամսյակի հաշվետվությունները։ Դրական ենք տրամադրված կարճաժամկետ պարտատոմսերի նկատմամբ, երկրորդային գործիքների և կորպորատիվ հիբրիդների նկատմամբ։  
• Զարգացող շուկաների պարտատոմսերի նկատմամբ դրական դիրքորոշումը փոփոխություն չի կրել, ռիսկերը լավ հավասարակշռված են։ Լավ հնարավորություններ կան անհատական դեպքերի համար, օրինակ՝ Արգենտինայի դեպքում, որտեղ շարունակում ենք դրական մնալ ԿԱ պարտատոմսերի նկատմամբ։

Արտարժույթ

• ԱՄՆ դոլարի նկատմամբ չեզոք ենք։ Կարծում ենք, որ դոլարը 2025թ. հունիսից ի վեր գտնվում է կոնսոլիդացիայի փուլում, իսկ սեզոնայնությունը կարող է տարեվերջին առաջացնել անկայունություն։ Ճապոնիայի ֆիսկալ դիրքորոշումը նշանակում է, որ իենի վրա ճնշումը կշարունակվի, սակայն հետևում ենք Ֆինանսների նախարարության հնարավոր միջնորդությանը և Ճապոնիայի բանկի տոկոսադրույքի բարձրացմանը։ 
• Զարգացող շուկաներում դրական ենք Լատինական Ամերիկայի արժույթների, մասնավորապես՝ BRL-ի և CLP-ի նկատմամբ։ Ապրանքների գների աճի թափը թուլացել է և կարող է ազդել որոշ ապրանք արտահանող երկրների արժույթների վրա։ 

ԲԱԺՆԵՏՈՄՍԵՐ

Գնահատումները վկայում են գլոբալ մոտեցման մասին

Բարրի Գլավին

Բաժնետոմսերի հարթակի ղեկավար

Այս տարի բաժնետոմսերն ապահովել են բարձր եկամտաբերություն՝ հիմնականում արհեստական բանականության շուրջ դրական տրամադրությունների և կորպորատիվ շահույթների կայունության շնորհիվ՝ չնայած ԱՄՆ-ում և Եվրոպայում տնտեսական ակտիվության խառը տիպի ազդանշաններին։ Այժմ մեր հիմնական հարցն այն է, թե որքանո՞վ են այդ դրական լուրերն արդեն իսկ արտացոլված գնահատումներում։ Բարձր մակարդակները մեծացնում են շրջադարձի ռիսկը, եթե եկամուտները կամ մարժաները հիասթափեցնեն։ Հետևաբար՝ տարվա վերջին կամ հաջորդ տարվա սկզբին ցանկացած անկայունություն կարող է գրավիչ հնարավորություններ ստեղծել այն որակյալ բիզնեսներում, որոնք օգուտ են քաղում են կառուցվածքային աճի գործոններից։

Նման բիզնեսներ տեսնում ենք, օրինակ, Եվրոպայում, ՄԹ-ում, Ճապոնիայում և զարգացող շուկաներում։ Եվրոպական ֆիսկալ և դրամավարկային քաղաքականությունը, ճապոնական կորպորատիվ բարեփոխումները, ինչպես նաև գրավիչ գնահատման գործակիցները ՄԹ-ում և փոքր կապիտալիզացիայով ընկերությունների հատվածում՝ մեզ համար մնում են կարևոր թեմաներ։

Զարգացած շուկաներ

• Ճապոնիայում գնահատման մակարդակները դեռևս չեն արտացոլում լավ կատարողականով վերջին հաշվետու սեզոնը, բաժնետոմսերի հետգնումները և կառուցվածքային բարեփոխումների սկզբնական թափը։ Մենք շարունակում ենք նախընտրել այնտեղ ընտրված բարձր որակի միջազգային բիզնեսները։ 
• Եվրոպայում ԵՄ մրցունակության բարձրացմանն ուղղված երկարաժամկետ բարեփոխումները, ֆիսկալ խթանները և էներգակիրների գների անկումը կօգնեն տարածաշրջանին չեզոքացնել ԱՄՆ սակագների կարճաժամկետ ազդեցությունը։
• Նախընտրում ենք փոքր և միջին կապիտալիզացիայի ընկերությունները՝ դրանց շահույթների աճի ներուժի և ներքին շուկայում ունեցած ազդեցության շնորհիվ։ Դրական ենք նաև ՄԹ-ի նկատմամբ, սակայն զգուշավոր ենք պետական պարտքի չափազանց աճի և բյուջետային դեֆիցիտի նկատմամբ։ 
• ԱՄՆ-ում, որտեղ գնահատումները բարձր են, առանցքային է հետևել ներդրումային ցիկլերին, մասնավորապես՝ ԱԲ-ի հետ կապված, և թե ինչպես են դրանք վերածվում շահույթների։

Զարգացող շուկաներ

• Զարգացող շուկաների բաժնետոմսերի համար նպաստավոր կլինեն տնտեսական աճը, դիվերսիֆիկացիայի շնորհիվ տրվող հնարավորությունները և համաշխարհային անցումը դեպի բազմակողմանի զարգացում։
• Չնայած Չինաստանի և ԱՄՆ-ի մերձեցմանը՝ մենք կարծում ենք, որ երկարաժամկետ տնտեսական մրցակցությունը կշարունակվի։ Ավելին՝ առևտրային «զինադադարը» ցույց տվեց, որ Չինաստանն ավելի ուժեղ է դուրս եկել առևտրային առճակատումից։ Տնտեսության տեսանկյունից երկրի արտահանումներն ու ներքին սպառումը մնում են թույլ։
• Հնդկաստանում, թեև հարաբերություններն ԱՄՆ-ի հետ աստիճանաբար բարելավվում են, կարծում ենք՝ գնահատումները դեռ բարձր են։ Այդուհանդերձ՝ մեր դրական դիրքորոշումը հիմնավորված է Հնդկաստանի երկարաժամկետ կառուցվածքային աճով և կայունությամբ։ 
• Այլքի կապակցությամբ՝ դրական ենք Լատինական Ամերիկայի նկատմամբ, այդ թվում՝ Բրազիլիայի և Մեքսիկայի, ինչպես նաև Եվրոպայի զարգացող շուկաների նկատմամբ։

ԲԱԶՄԱԱԿՏԻՎ (MULTI-ASSET)

Ավելի հավասարակշռված դիրքորոշում ռիսկի նկատմամբ

Ֆրանչեսկո Սանդրինի

Բազմաակտիվների ռազմավարության գծով ստորաբաժանման ղեկավար 

Ջոն Օթուլ

Բազմաակտիվների ներդրումների գծով լուծումների ստորաբաժանման ղեկավար

«ԱՄՆ միջին կապիտալիզացիայի ընկերություններում շահույթների դինամիկայի փոփոխությունները և խոշոր կապիտալիզացիայի ընկերություններում գնահատման մտահոգությունները մեզ ստիպել են մասամբ տեղափոխել ԱՄՆ-ի նկատմամբ դրական մեր դիրքորոշումը դեպի եվրոպական բաժնետոմսեր»։

Չնայած ԱՄՆ-ի և Չինաստանի միջև համաշխարհային մակարդակով մրցակցության շարունակությանը՝ ընթացիկ տնտեսական ցիկլի ուշ փուլում նկատում ենք տարբեր տարածաշրջաններում առանձնահատուկ արձագանքներ։ Օրինակ՝ Եվրոպայում տնտեսական աճը, ամենայն հավանականությամբ, կլինի բավարար, սակայն ներուժից ցածր, ԱՄՆ-ում սպառումը դեռևս պահպանվում է, բայց աշխատաշուկայի թուլացումը ցույց է տալիս, որ այն կայուն չէ։ Հետևաբար՝ մենք հարմարեցնում ենք տեղաբաշխման վերաբերյալ մեր դիրքորոշումն այս առանձնահատկություններին և արժեք ենք փնտրում ակտիվների տարբեր դասերում։ Այդ գործընթացում պահպանում ենք դիվերսիֆիկացված մոտեցում այն տարածաշրջանների նկատմամբ, որտեղ շահույթները, գնահատումները և մակրոմիջավայրն ապահովում են գրավիչ ռիսկ/եկամտաբերություն հարաբերակցություն։ Այսպիսով, պահպանում ենք ռիսկային դիրքորոշումը՝ մեղմ ճշգրտումներով, պաշտպանիչ միջոցներով և ոսկու նկատմամբ դրական տրամադրվածությամբ։

Կառուցողական ենք տրամադրված բաժնետոմսերի նկատմամբ և արձանագրում ենք դիվերսիֆիկացիայի միտումն ԱՄՆ-ից դուրս տարածաշրջաններ տեղափոխելու հարցում ավելի մեծ ներուժ՝ այս տարվա ուժեղ շուկայական տատանումներից հետո։ Չենք կիրառում ԱՄՆ միջին կապիտալիզացիայի ընկերությունների նկատմամբ դրական դիրքորոշումը՝ շահույթների դինամիկայի թուլացման և Դաշնային պահուստի տոկոսադրույքների իջեցումների շուրջ հնարավոր անկայունության պատճառով։ Բացի դրանից՝ նվազեցրել ենք S&P 500-ի նկատմամբ դրական տրամադրվածությունը՝ ինչպես գնահատման մտահոգությունների, այնպես էլ ԱԲ-ի հետ կապված ընկերությունների նկատմամբ չափազանց խանդավառության պատճառով։ Ի հակադրություն դրան՝ դրական ենք մնում ՄԹ-ի նկատմամբ և լավատեսական ենք դարձել Եվրոպայի հանդեպ՝ շնորհիվ գրավիչ գնահատումների և հաջորդ տարվա շահույթների ուժեղ սպասումների։ Պահպանում ենք դրական դիրքորոշումը զարգացող շուկաների բաժնետոմսերի և հատկապես չինական բաժնետոմսերի նկատմամբ։ 

Ֆիքսված եկամտի ասպարեզում ընդհանուր առմամբ թեթևակի դրական ենք ժամկետայնության նկատմամբ և պահպանում ենք դրական դիրքորոշումն իտալական պետական պարտատոմսերի նկատմամբ (գերմանականների համեմատ)։ Իտալիայի քաղաքական կայունությունն ու պարտքի կայունացման ջանքերը հաստատում են մեր դիրքորոշումը։ Վարկային հատվածում ԵՄ ՆԴ ապահովում է ամուր կորպորատիվ ցուցանիշներ և տեխնիկական բնութագրիչներ։ Զարգացող շուկաների  պարտատոմսերի սփրեդները զգալիորեն նեղացել են, ուստի մարտավարական առումով իջեցրել ենք դրանց գնահատականը։ Կրկնում ենք՝ զարգացող շուկաների համար բացասական կատալիզատորները սահմանափակ են, իսկ ֆինանսական պայմաններն ընդհանուր առմամբ մնում են բարենպաստ։

Արտարժույթի հարցում դրական ենք EUR/USD-ի նկատմամբ, ինչպես նաև NOK-ի և JPY-ի նկատմամբ՝ եվրոյի համեմատ։ Թեև կառուցվածքային գործոնները երկարաժամկետ կճնշեն դոլարը, NOK-ը (ռիսկային փուլում) և իենը (ԲՃԲ-ի նորմալացման ֆոնին) պետք է եվրոյի համեմատ լավ ցուցանիշներ ունենան։

Ակտիվների դասերի վերաբերյալ Ամունդի դիրքորոշում

ԿԱՐԵՎՈՐ ՏԵՂԵԿՈՒԹՅՈՒՆ

ՄՍՄԿ-ի տեղեկությունները կարող են գործածվել միայն Ձեր ներքին օգտագործման համար, չեն կարող վերարտադրվել կամ տարածվել որևէ ձևով և չեն կարող գործածվել որպես որևէ ֆինանսական գործիքի կամ պրոդուկտի կամ ինդեքսի հիմք կամ դրա բաղադրիչ։ ՄՍՄԿ-ի որևէ տեղեկություն նախատեսված չէ լինելու ներդրումային խորհրդատվություն կամ որևէ տեսակի ներդրումային որոշում կայացնելու (կամ դրանից զերծ մնալու) առաջարկություն, և դրա վրա չի կարելի հիմնվել որպես այդպիսին։ Պատմական տվյալները և վերլուծությունը չպետք է ընկալվեն որպես որևէ հետագա կատարողականի վերլուծության, կանխատեսման կամ կանխագուշակման մասին նշում կամ երաշխիք։ ՄՍՄԿ-ի տեղեկությունները տրամադրվել են «այնպես, ինչպես կա» հիմքով, և սույն տեղեկություններն օգտագործողն ստանձնում է սույն տեղեկությունների ցանկացած օգտագործման բոլոր ռիսկերը։ ՄՍՄԿ-ն, դրա փոխկապակցված անձինք և յուրաքանչյուր անձ, որը ներգրավված է ՄՍՄԿ-ի որևէ տեղեկություն կազմելուն կամ կապված է դրա հետ (միասին «ՄՍՄԿ կողմեր»), սույն տեղեկությունների մասով բացահայտ հրաժարվում է բոլոր երաշխիքներից (այդ թվում, առանց սահմանափակման, բնօրինակության, ճշգրտության, ամբողջականության, ժամանակին լինելու, խախտում չկատարելու, վաճառքի համար պիտանիության և կոնկրետ նպատակին համապատասխանության վերաբերյալ ցանկացած երաշխիքից)։ Չսահմանափակելով վերոնշյալ որևէ դրույթ, ՄՍՄԿ որևէ կողմ որևէ դեպքում չի կրում որևէ պատասխանատվություն որևէ ուղղակի, անուղղակի, հատուկ, պատահական, պատժիչ, հետևանքային (այդ թվում, առանց սահմանափակման, բաց թողնված օգուտի) կամ որևէ այլ վնասի համար։ (www.mscibarra.com)։ 

SM արդյունաբերությունների դասակարգման համաշխարհային ստանդարտը (ԱԴՀՍ) մշակվել է «Ստենդրդ ընդ Փուրզ»-ի և ՄՍՄԿ-ի կողմից և դրանց բացառիկ սեփականությունն ու ծառայությունների ապրանքանիշն է։ Ոչ «Ստենդրդ ընդ Փուրզ»-ը, ՄՍՄԿ-ն և ոչ էլ ԱԴՀՍ որևէ դասակարգում մշակելուն կամ կազմելուն ներգրավված որևէ այլ կողմ որևէ բացահայտ կամ ենթադրյալ երաշխիք կամ հավաստիացում չի տալիս այդ ստանդարտի կամ դասակարգման (կամ դրանց օգտագործումից ստացվելիք արդյունքի) վերաբերյալ, և այդ բոլոր կողմերը սույնով բացահայտ հրաժարվում են ցանկացած այդպիսի ստանդարտի կամ դասակարգման առնչությամբ բնօրինակության, ճշգրտության, ամբողջականության, վաճառքի համար պիտանիության կամ կոնկրետ նպատակին համապատասխանության վերաբերյալ ցանկացած երաշխիքից։ Չսահմանափակելով վերոնշյալ որևէ դրույթ, «Ստենդրդ ընդ Փուրզ»-ը, ՄՍՄԿ-ն, դրան որևէ փոխկապակցված անձ կամ ԱԴՀՍ որևէ դասակարգում մշակելուն կամ կազմելուն ներգրավված որևէ երրորդ կողմ որևէ պատասխանատվություն չի կրում որևէ ուղղակի, անուղղակի, հատուկ, պատժիչ, հետևանքային կամ որևէ այլ վնասի (այդ թվում՝ բաց թողնված օգուտի) համար, նույնիսկ եթե ծանուցվել է այդ վնասների հնարավոր լինելու մասին։

Սույն փաստաթուղթը նախատեսված է միայն տեղեկատվական նպատակների համար: Սույն փաստաթուղթը չի  հանդիսանում վաճառքի առաջարկ, գնման առաջարկի հրավեր կամ որևէ արժեթղթի կամ որևէ այլ պրոդուկտի կամ ծառայության առաջարկություն։ Ցանկացած արժեթուղթ, պրոդուկտ կամ ծառայություն, որին հղում է կատարվում, կարող են գրանցված չլինել Ձեր պետությունում համապատասխան մարմնի կողմից վաճառքի համար և կարող են չկարգավորվել կամ չվերահսկվել Ձեր պետությունում որևէ պետական կամ համանման մարմնի կողմից։ Այս փաստաթղթում պարունակվող տեղեկատվությունը չպետք է փոփոխվի կամ ներկայացվի այնպես, որ առաջացնի թյուրընկալումներ կամ սխալ հավաստիացումներ։ Փաստաթղթի բովանդակության ցանկացած օգտագործում, վերարտադրում կամ տարածում առանց ամբողջական և պատշաճ հղման սկզբնաղբյուրին արգելվում է։ Սույն փաստաթղթում պարունակվող ցանկացած տեղեկություն չի կարող օգտագործվել որպես որևէ ֆինանսական գործիքի կամ պրոդուկտի կամ ինդեքսի հիմք կամ դրա բաղադրիչ։ Ավելին, ոչինչ սույն փաստաթղթում նախատեսված չէ հարկային, իրավական կամ ներդրումային խորհրդատվություն տրամադրելու համար։ Եթե այլ բան նշված չէ, ապա սույն փաստաթղթում պարունակվող բոլոր տեղեկություններն ստացվել են «Ամունդի Ասեթ Մենեջմենթ ԷսԱԷս» ընկերությունից և ներկայաված են 2025 թվականի նոյեմբերի 30-ի դրությամբ։ Դիվերսիֆիկացիան չի երաշխավորում շահույթ կամ չի պաշտպանում կորուստից։ Սույն փաստաթուղթը տրամադրվել է «այնպես, ինչպես կա» հիմքով, և սույն տեղեկություններն օգտագործողն ստանձնում է սույն տեղեկությունների ցանկացած օգտագործման բոլոր ռիսկերը։ Պատմական տվյալները և վերլուծությունը չպետք է ընկալվեն որպես որևէ հետագա կատարողականի վերլուծության, կանխատեսման կամ կանխագուշակման մասին նշում կամ երաշխիք։ Շուկայի և շուկայի միտումների վերաբերյալ արտահայտված տեսակետները հեղինակի տեսակետներն են և պարտադիր չէ, որ լինեն «Ամունդի Ասեթ Մենեջմենթ ԷսԱԷս» ընկերության կամ Ամունդի-Ակբա Ասեթ Մենեջմենթ ՓԲԸ-ի տեսակետներ ու ցանկացած պահի ենթակա են փոփոխության՝ շուկայի և այլ պայմանների հիման վրա, և չեն կարող լինել հավաստիացումներ առ այն, որ երկրները, շուկաները կամ ոլորտները կհամապատասխանեն ակնկալիքներին։ Սույն տեսակետները պետք չէ հիմք ընդունել որպես ներդրումային խորհրդատվություն, արժեթղթի առաջարկություն կամ «Ամունդի» ընկերության կամ Ամունդի-Ակբայի որևէ պրոդուկտի առքուվաճառքի մասին նշում։ Ներդրումը ներառում է ռիսկեր, այդ թվում՝ շուկայական, քաղաքական, իրացվելիության և արժույթի հետ կապված ռիսկեր։ Ավելին, «Ամունդին» կամ Ամունդի-Ակբան որևէ դեպքում չեն կրում որևէ պատասխանատվություն դրա հետևանքով առաջացած որևէ ուղղակի, անուղղակի, հատուկ, պատահական, պատժիչ, հետևանքային (այդ թվում, առանց սահմանափակման, բաց թողնված օգուտի) կամ որևէ այլ վնասի համար։

Առաջին օգտագործման ամսաթիվը՝ 2025թ նոյեմբերի 30։ 

«Ամունդի-Ակբա Ասեթ Մենեջմենթ» ՓԲԸ-ն իրավաբանական անձ է, որը գրանցված է Հայաստանի Հանրապետությունում և Հայաստանի Կենտրոնական բանկի կողմից տրամադրած ներդրումային ֆոնդերի կառավարման թիվ 0002-ի լիցենզիայի հիման վրա, Հայաստանի Հանրապետությունում իրականացնում է պարտադիր կենսաթոշակային ֆոնդերի կառավարում։ Գրանցված գրասենյակը գտնվում է Երևան, Վազգեն Սարգսյան 10, 100-101 տարածք։  

Ամունդի-Ակբայի մասին ավելին իմանալու համար կարող եք այցելել www.amundi-acba.am կամ զանգահարել 011-310-000։