Անդադար ընթացք

Անցյալ տարի շուկայական աշխուժացումը բնութագրվում էր դիմակայունությամբ, որն էլ, ըստ ամենայնի, կշարունակվի 2026 թվականին, քանի որ համաշխարհային տնտեսությունն անցում է կատարում նոր, նորարարության վրա հիմնված ռեժիմի, իսկ աշխարհաքաղաքականությունը մտնում է վերահսկվող խառնաշփոթի փուլ։ 

Արհեստական բանականության (ԱԲ) և հարակից ոլորտներում ներդրումները կնպաստեն ընդհանուր աճին և կապահովեն, որ ԱՄՆ-ում հաջորդ տարվա աճի դանդաղումը չվերածվի տնտեսական անկման։ Եվրոպայի հեռանկարների վերաբերյալ նույնպես կան լավատեսության հիմքեր։ Միաժամանակ Չինաստանում, Հնդկաստանում և ընդհանուր առմամբ զարգացող շուկաներում աճը կմնա դիմակայուն։ 

Արժեթղթերի բարձր գները, հետևաբար, կարող են պահպանվել, բայց մենք ուշադիր հետևում ենք այն ռիսկին, որ շահույթները կարող են չհամապատասխանել բարձր սպասումներին։ Այսպիսի ռիսկերի մշտադիտարկումը կարևոր է՝ հաշվի առնելով նոր աշխարհաքաղաքական կարգի հնարավոր ցնցումները, որի առանձնահատկություններն են՝ մրցակցությունը տարբեր ոլորտներում, բայց նաև համագործակցությունը որոշ հարցերի շուրջ, ինչպիսիք են կլիմայի փոփոխությունը կամ ԱԲ-ի անվտանգության միջոցները։

Այս իրավիճակը բարդացնելու է գնաճի կանխատեսումները։ Այս խնդիրն ավելի թույլ է արտահայտված եվրոգոտում, որտեղ մենք ակնկալում ենք, որ Եվրոպական կենտրոնական բանկը կհասնի գնաճի իր թիրախին։ Սակայն ԱՄՆ գնաճն ավելի երկար ժամանակով բարձր կմնա:

Իրական տոկոսադրույքները կարող են կայունանալ ավելի բարձր մակարդակներում, քան վերջին մի քանի տասնամյակների ընթացքում նորմալ համարվողները։ Սա կարող է վերաբերել նաև ցանկացած «blue-chip» ինդեքսի գնահատականներին, որոնցում մեծ կշիռ ունեն նորարարության հետ կապված ընկերությունների բաժնետոմսերը։ Ակտիվների բաշխումը նույնպես պետք է հարմարեցվի, եթե որոշ ավանդական շուկայական հարաբերությունների խաթարումը շարունակվի։ Դրանք ներառում են ոսկու ու բաժնետոմսերի գների միաժամանակյա աճը, ինչպես նաև ԱՄՆ դոլարի միտումը շարժվել ռիսկային ակտիվների հետ համատեղ։ 

Դիվերսիֆիկացումն ու ռիսկերի ապահովագրումը թույլ կտան ներդրողներին մեղմել ռիսկերը և միևնույն ժամանակ առավելագույնս օգտվել հաջորդ տարի նոր տեխնոլոգիաներով առաջարկվող հնարավորություններից։

«Տնտեսությունը հարմարվում է «վերահսկվող խառնաշփոթի» նոր ռեժիմին։ Տեխնոլոգիաների գլխավորած փոխակերպումը, ֆիսկալ խթանումը և արդյունաբերական քաղաքականությունը պահպանում են ակտիվությունը և հանգեցնում նոր հաղթողների առաջացմանը։ Գնաճը դառնում է կառուցվածքային ուղղություն, որը ներդրողները պետք է հաշվի առնեն իրենց բաշխումներում»։ 

Մոնիկա Դեֆենդ 

Ամունդի ներդրումային ինստիտուտի ղեկավար

2026 թվականի ներդրումային ուղղություններ

«Դիվերսիֆիկացիան շարունակում է մնալ ամենաարդյունավետ պաշտպանությունը բաժնետոմսերի կենտրոնացված շուկաների և բարձր գնահատումների աշխարհում։ Ռիսկերը մեղմելու և հնարավորություններից օգտվելու համար ներդրողների պորտֆելները պետք է վերահավասարակշռվեն ըստ ոճերի, ոլորտների, չափերի և տարածաշրջանների, հատկապես՝ Զարգացող շուկաների և եվրոպական ակտիվների դեպքում»։ 

Վինսենթ Մորտիե

Խմբի Գլխավոր ներդրումային ղեկավար

2026 թվականի հիմնական հայեցակետեր

Շրջափուլը շարունակվում է. անցում, ոչ թե անկում

2026 թվականը կլինի անցումային տարի, քանի որ համաշխարհային տնտեսությունը հարմարվում է «վերահսկվող խառնաշփոթի» ռեժիմին։ ԱԲ-ով պայմանավորված կապիտալ ծախսերը, արդյունաբերական քաղաքականության փոփոխությունները, սակագների նկատմամբ բիզնեսի ավելի մեծ դիմակայունությունը և հավանական դրամավարկային մեղմացումը պետք է պահպանեն ակտիվությունը և երկարացնեն ցիկլը։ Ներդրողները պետք է վերանայեն բաժնետոմսերի կենտրոնացումը և գնահատումների ռիսկերը, աճող պետական պարտքը, աշխարհաքաղաքական ուժերի բախումները և արտադրության տեղայնացման ու էներգետիկ անցման պատճառով կայուն գնաճը։ Համաշխարհային ՀՆԱ-ի աճը 2026 թվականին կլինի չափավոր, սակայն դիմակայուն՝ մինչև 3 տոկոս։ 

Դիվերսիֆիկացիա՝ վերահսկվող խառնաշփոթի ժամանակաշրջանում

«Վերահսկվող խառնաշփոթը», որի ժամանակ կառավարություններն ու բիզնեսները ձգտում են պահպանել առևտրային և ներդրումային հոսքերը, կվերասահմանի հնարավորությունները համաշխարհային մակարդակում։ 2026 թվականի համար մեր բազային սցենարը մեղմ ռիսկային է՝ բաժնետոմսերի և ներդրումային դասի վարկանիշի (Investment Grade) նկատմամբ հակվածությամբ։ Խոցելիության և գերագնահատումների հետևանքով առաջացող լուրջ ռիսկերի պայմաններում պորտֆելները պետք է համադրեն աճի ազդեցությունը ոսկու, մի շարք արժույթների (ճապոնական իեն, եվրո) և գնաճին կցված գործիքների հետ հեջավորմամբ, ինչպես նաև մասնավոր շուկաներում ավելի մեծ, սակայն ընտրողական բաշխումներով։ Մասնավոր վարկը և ենթակառուցվածքներն ուշադրության կենտրոնում են՝ եկամուտների և գնաճի տեմպերի դիմակայունության բարելավման համար, ինչպես նաև ռազմավարական ուղղություններից օգտվելու համար, ինչպիսիք են՝ էլեկտրայնացումը, արտադրության տեղայնացումը, ԱԲ-ն և մասնավոր կապիտալի կայուն պահանջարկը, հատկապես Եվրոպայում։ 

Բաժնետոմսերի դեպքում պետք է լայն մտածել և փնտրել ոլորտներ՝ տեխնոլոգիական մրցավազքից դուրս

Տեխնոլոգիայի գծով կապիտալ ծախսերի ցիկլը շարունակում է մնալ առանցքային, սակայն տեխնոլոգիական ուղղությունն ընդլայնվում է ԱՄՆ-ից դուրս՝ դեպի Չինաստան, Թայվան, Հնդկաստան, Եվրոպա և Ճապոնիա։ ԱՄՆ գերխոշոր կապիտալով ընկերությունների կենտրոնացման ռիսկը և ԱՄՆ բացառիկության մարելու հավանականությունը վկայում են աշխարհագրական և ոլորտային դիվերսիֆիկացիայի անհրաժեշտության մասին։ Մենք նախընտրում ենք համադրել ԱԲ գծով ներդրումները պաշտպանական և ցիկլային այնպիսի ուղղությունների հետ, ինչպիսիք են ֆինանսական և արդյունաբերական ոլորտները, որոնք կօգտվեն ավելի բարձր ներդրումներից, պաշտպանության ոլորտում գործող ընկերությունները, որոնք կապված են անվտանգության գծով ծախսերի հետ, և կանաչ անցման բաժնետոմսերը, որոնք կապված են էլեկտրայնացման և էներգետիկ ցանցերի հետ։ 

Դրամավարկային-ֆիսկալ փոխգործակցությունը կապահովի ֆիքսված եկամտի հնարավորությունները

Շուկաները գործելու են ըստ համապատասխան քաղաքականության ընտրության։ ԱՄՆ պարտքն աննախադեպ բարձր է, ինչը խորացնում է Դաշնային պահուստի անկախության ռիսկերը՝ գնաճի դեռևս թիրախից բարձր լինելու պայմաններում։ Ուժերի այսպիսի հավասարակշռությունը պետք է պահի ԱՄՆ պարտատոմսերի եկամտաբերությունն իր սահմաններում, ինչը նպաստավոր է ժամկետայնության մասով մարտավարական դիրքորոշման և գնաճի հետևանքներից պաշտպանվելու հարցում։ 2026 թվականին եվրոպական պարտատոմսերը շարունակում են առանցքային մնալ գլոբալ ներդրողների համար՝ ԵՄ ռիսկային պարտատոմսերի (peripheral bonds) և ՄԹ պետական պարտատոմսերի վրա առանձնահատուկ կենտրոնացմամբ։ Վարկերի մասով նախընտրում ենք ամուր հիմունքներով եվրո ներդրումային դասի վարկանիշը (Investment Grade) և զգուշավոր ենք ԱՄՆ բարձր եկամտաբերության նկատմամբ, որը ենթակա է տարածաշրջանային բանկերի և սպառողից կախվածության ռիսկերին։ Մենք կարծում ենք, որ դոլարը կշարունակի թուլանալ, սակայն այդ գործընթացը գծային չի լինի։ 

Զարգացող շուկաները և Եվրոպան՝ երկարաժամկետ զարգացման երկու տարբեր շարժիչներ

Զարգացող շուկաներում և Եվրոպայում հատվում են կարճաժամկետ զարգացումն ու երկարաժամկետ հնարավորությունները։ Զարգացող շուկաների աշխուժացումը շարունակվելու է նաև 2026 թվականին՝ թույլ դոլարի, Դաշնային պահուստի կողմից տոկոսադրույքի հավանական իջեցումների և դրանց աճի առավելության շնորհիվ նպաստավոր պայմաններ են ստեղծվում Զարգացող շուկաների պարտատոմսերի եկամտաբերության և մի շարք բաժնետոմսերի համար։ Եվրոպայի գրավչությունը պետք է աճի տարվա ընթացքում, քանի որ բարեփոխումները՝ համադրված պաշտպանության և ենթակառուցվածքների ծախսերով, կվերածվեն շոշափելի հնարավորությունների՝ հատկապես եվրոյով վարկերում և փոքր ու միջին կապիտալիզացիայով բաժնետոմսերում (կենտրոնանալով ներքին միտումների և գրավիչ գնահատումների վրա)։

«Եվրոպան շարունակում է իր ուղին, որի ընթացքում բարեփոխումները, պաշտպանությանն ուղղված ներդրումները և արդյունաբերական քաղաքականությունը վերաձևավորում են նրա ներդրումային լանդշաֆտը։ Մենք հնարավորություններ ենք տեսնում եվրոյով վարկերում, ենթակառուցվածքներում և ռազմավարական ինքնավարության ուղղություններում, որոնք կարող են վերափոխել Եվրոպայի ֆինանսական էկոհամակարգը և օգնել չափավոր աճից անցում կատարել դեպի ավելի կայուն երկարաժամկետ զարգացում»։

Ֆիլիպ Դ՛Օրգեվալ

Խմբի ԳՆՏ տեղակալ

Ակտիվների դասերի հեռանկարներ